14:42, 27 - ناۋرىز 2023 | GMT +6
استانادا 1000 ادامدى جۇمىسپەن قامتيتىن فۋلفيلمەنت ورتالىعى قولدانىسقا بەرىلدى
استانا. قازاقپارات - استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ماقسات جاڭابايەۆ ەلوردادا «Ozon» فۋلفيلمەنت ورتالىعىن اشۋ نە ءۇشىن قاجەت بولعانىن ءتۇسىندىردى، دەپ حابارلايدى قازاقپارات ءتىلشىسى.
«شىنىمەن دە «Ozon» فۋلفيلمەنت ورتالىعى قولدانىسقا بەرىلدى. بۇل - 1000-نان استام جۇمىس ورنىن تۇزەتىن ءىرى لوگيستيكالىق كەشەن. ينۆەستيتسيانىڭ جالپى سوماسى - 40 ميلليون تەڭگە. اتالعان فۋلفيلمەنت ورتالىعى كاسىپكەرلەرگە 9 ميلليون ءتۇرلى تاۋاردى ساقتاۋعا مۇمكىندىك بەرەدى»، - دەدى ول باسپا ءسوز كونفەرەنتسياسىندا.
سونداي- اق، ول اتالمىش ورتالىقتىڭ قىزمەتىنە قويماسى جوق دۇكەن يەلەرى جۇگىنە الاتىنىن ايتتى.
«بۇل اسىرەسە ءوزىنىڭ قويماسى جوق، سونداي- اق ارنايى قويما جالداۋدى ءتيىمسىز دەپ ەسەپتەيتىن دۇكەندەرگە قولايلى. ياعني، فۋلفيلمەنت ورتالىعى لوگيستيكا ماسەلەسىن شەشۋ ءۇشىن قۇرىلىپ وتىر»، - دەدى ماقسات جاڭابايەۆ.
اۆتور
ەسىمجان ناقتىباي