يرلانديادان اكەلىنگەن 1000 باس ءىرى قارا جامبىل جەرىنە جەرسىنىپ كەلەدى
وسىدان ءتورت-بەس اي بۇرىن اتالعان مەملەكەتتەن وبلىسقا 1000 باس ءمۇيىزدى ءىرى قارا جەتكىزىلگەن بولاتىن، دەپ حابارلايدى قازاقپارات ءتىلشىسى.
اتالعان سەرىكتەستىك ديرەكتورىنىڭ ورىنباسارى باقىت يسكاليەۆتىڭ ايتۋىنشا، اكەلىنگەن قۇناجىندار بۇگىندە مويىنقۇم وڭىرىندەگى «بەسكەپە» ورمان شارۋاشىلىعىنىڭ قورىنداعى قىستاۋدا باعىلىپ جاتىر.
«قۇناجىنداردى اكەلمەس بۇرىن جالپاقتوبە اۋىلىنداعى جانە مويىنقۇم وڭىرىندەگى مال جايىلىمىنان قورا-جايىمىزدى دايىنداپ الدىق. قۇناجىندار يرلانديا جەرىندە ءبىر اي جانە وسىندا ەكى-ءۇش اي ۆەتەريناريالىق باقىلاۋدا بولىپ، كارانتيننەن ءوتتى. ءبىزدىڭ نەگىزگى ماقساتىمىز - اسىل تۇقىمدى مال شارۋاشىلىعىن دامىتۋ. سونىمەن بىرگە ەگىن شارۋاشىلىعىمەن دە اينالىسۋ. بۇگىندە يەلىگىمىزدە 14800 گەكتار جايىلىمدىق جەرىمىز بولسا، ونىڭ 5600 گەكتارى «بەسكەپە» ورمان شارۋاشىلىعىنىڭ قورىنداعى جەر تەلىمىندە ورنالاسقان»، - دەيدى ول.
ولار ءمۇيىزدى ءىرى قارانى 500 باستان ءبولىپ، ەكى قورا-جايعا ورنالاستىرعان.
«شەت مەملەكەتتەن كەلگەن مال ءبىزدىڭ جەرىمىزگە جەرسىنۋدە. بۇگىندە ءبارى دە قوڭدى. مال ازىعىنا دەپ 666 توننا ءشوپ، 110 توننا جەم دايىندالعان. مالشىلاردىڭ استىندا ءمىنىس اتتارى بار. ولاردىڭ ورتاشا ەڭبەك جالاقىسى 120-150 مىڭ تەڭگەنى قۇرايدى. سەرىكتەستىكتى قۇرعانىمىزعا ءبىر جىل تولعانىنا قاراماستان ءبىز بولاشاقتا ەت جانە ءسۇت باعىتىندادا جۇمىس ىستەۋدى جوسپارلاپ وتىرمىز. مال باسىن ولاردىڭ ءتولى ەسەبىنەن كوبەيتپەكپىز»، - دەيدى سەرىكتەستىك باسشىسى.
سەرىكتەستىكتە ءبىراز جۇمىس مەحانيكالاندىرىلعان. شارۋاشىلىققا قاجەتتى «م ت ز-952» تراكتورىن، دەزينفەكتسيالىق جۇمىستارعا ارنايى جابدىقتالعان «ۋاز» اۆتوكولىگىن، ەكى دانا «پ ت س-6» ماركالى جۇك تيەگىش پەن قي شىعاراتىن تىركەمەلەردى ساتىپ الىپتى. شارۋاشىلىقتا 20 ادام تۇراقتى جۇمىسپەن قامتىلعان.