بريۋسسەل مۋزەيىنە «قازاقتىڭ ءداستۇرلى 1000 كۇيى» انتولوگياسى تاپسىرىلدى
س ءى م اقپاراتىنا سايكەس، قازاقستاننىڭ بەلگياداعى ەلشىسى ايگۇل قۇسپان «رۋحاني جاڭعىرۋ» مەملەكەتتىك باعدارلاماسىن ىسكە اسىرۋ شەڭبەرىندە بريۋسسەلدەگى مۋزىكالىق اسپاپتار مۇراجايىنىڭ باس ديرەكتورى الەكساندرا دە پورتەرمەن جانە توپتامالار باسقارماسىنىڭ باستىعى ساسكيا ۋيللارتپەن كەزدەستى.
ا. قۇسپان قازاقتىڭ مۋزىكالىق قازىناسى - كۇي تۋرالى كەڭىنەن اڭگىمەلەدى. دومبىرا، قوبىز، سىلدىرماق جانە باسقا دا قازاق اسپاپتارى جۇزدەسۋدىڭ جەكە تاقىرىبى بولدى. ەلشى اباي، ءبىرجان، جامبىل، ىقىلاس، دينا جانە تاعى باسقا اقىندار مەن كومپوزيتورلار ويناعان قازاق اسپاپتارىنىڭ ۇزدىك ۇلگىلەرى الماتىداعى ىقىلاس اتىنداعى حالىق مۋزىكالىق اسپاپتار مۇراجايىندا جينالعانىن ايتتى.
ديپلومات بريۋسسەل مۇراجايىنىڭ باسشىلىعىنا 2011-جىلى «مادەني مۇرا» ۇلتتىق جوباسىنىڭ اياسىندا شىققان «قازاقتىڭ ءداستۇرلى 1000 كۇيى» انتولوگياسىن سىيعا تارتتى.
بەلگيالىق مۇراجايشىلار قازاق مۋزىكالىق مادەنيەتىنە ۇلكەن قىزىعۋشىلىق تانىتتى جانە ىقىلاس اتىنداعى حالىق مۋزىكالىق اسپاپتار مۇراجايىمەن ىنتىماقتاسۋعا ازىرلىگىن ءبىلدىردى.
ارنايى ۇيىمداستىرىلعان ەكسكۋرسيا بارىسىندا ەلشىگە قازاق ۇلتتىق اسپاپتارىن بريۋسسەل مۇراجايىنا قويۋ ۇسىنىسى ايتىلدى.
«بەلگيالىق تاراپ سيفرلاندىرۋ سالاسىنداعى تاجىريبەمەن بولىسۋگە دايىن. مۇراجايدىڭ جالپىعا قول جەتىمدى Carmentis دەرەك قورىندا مۋزىكالىق اسپاپتار تۋرالى بارلىق مالىمەتتەر بار. سونىمەن قاتار، الەمنىڭ كوپتەگەن مۇراجايلارىنىڭ كوللەكتسيالارىن ۇسىناتىن مۋزىكالىق اسپاپتاردىڭ «MIMO» حالىقارالىق دەرەكقورى قىزمەت ەتۋدە»، - دەلىنگەن س ءى م مالىمەتىندە.
بريۋسسەلدىڭ مۋزىكالىق اسپاپتار مۇراجايى 1876-جىلى قۇرىلعان جانە بەلگيا كورولدىگىنىڭ تاريحي جانە ونەر مۇراجايلارىنىڭ قۇرامىنا كىرەدى. مۇراجاي قورىندا بەلگيانىڭ جانە الەمنىڭ باسقا دا ەلدەرىنىڭ 1100 مۋزىكالىق اسپابى بار. بۇل الەمدەگى ەڭ ءىرى جانە باي كوللەكتسيالاردىڭ ءبىرى بولىپ تابىلادى.