شارباقتىلىق تۇرعىن 1000 شاقىرىم جولدى اتپەن ءجۇرىپ وتپەك
بۇل تۋرالى ەرجان كاكىمبايەۆ اگەنتتىككە بەرگەن سۇحباتىندا ايتتى.
«12 -ماۋسىم كۇنى جولعا شىعۋدى جوسپارلاپ وتىرمىز، - دەيدى ەرجان كاكىمبايەۆ. - استانالىق جانە باسقا دا وڭىرلەردەن كەلگەن 10 شاقتى ادام شىعادى. مەنىمەن بىرگە جەرلەسىم سەرىك ەسجانوۆ بارۋعا نيەت ءبىلدىردى. كۇنىنە 100 شاقىرىمنان 10 كۇن جولدا وتەدى. بىلتىرعى جىلى ەكسپو-2017 كورمەسىنە وراي استانا قالاسىنان باياناۋىل اۋدانىنا دەيىن 600 شاقىرىم جولدى جىلقىمەن ءجۇرىپ وتكەن بولاتىنبىز. اتا-بابالارىمىز سياقتى جولدا ۇيىقتاپ، تاماقتانۋعا تۋرا كەلەدى. الايدا تازا اۋادا، تابيعاتتىڭ اياسىنداعى ساياحاتتان الاتىن اسەر ەرەكشە».
«كاكىمبايەۆ» شارۋا قوجالىعىنا يەلىك ەتىپ وتىرعان اۋىل تۇرعىنى 100 شاقتى قارا مال مەن بەس باس جىلقى ۇستايدى. جۋىردا ات ءتۋريزمىن دامىتۋ ماقساتىندا 3 ميلليون تەڭگە قايتارىمسىز مەملەكەتتىك گرانت العان. بۇل قارجىعا ول الماتى وبلىسىنىڭ قاسكەلەڭ قالاسىنان ات ابزەلدەرى مەن بىرنەشە باس جىلقى ساتىپ الۋدى كوزدەپ وتىر.
«ءبىر ايدان كەيىن 10 ادامنان باستاۋدى كوزدەپ وتىرمىز، - دەيدى ەرجان كاكىمبايەۆ. - ولاردى ەسىلباي اۋىلىنان عابدۋل ۋاحيت حازىرەت كەسەنەسىنە دەيىن 30 شاقىرىم جەرگە جىلقىمەن جەتكىزەمىز. جاستاردىڭ اراسىندا جاز مەزگىلىندە جاباعى جارىسىن ۇيىمداستىرىپ تۇرامىز. سەبەبى، مۇنداي شارالار بوس ۋاقىتتى ءتيىمدى وتكىزىپ، دەنساۋلىقتى نىعايتۋعا مۇمكىندىك بەرەدى».
بيىلعى جىلى 10 -ناۋرىزدا اۋداننىڭ 90 جىلدىعىنا وراي «ەرتىس ورمانى» رەزەرۆاتىنىڭ اۋماعىندا ەسىلباي - عابدۋل ۋاحيت حازىرەت تۋريستىك ايماعى - ەسىلباي مارشرۋتى بويىنشا ۇزىندىعى 85 شاقىرىمدىق ات ءتۋريزمى ماۋسىمى اشىلعان.