س ق و- دا 100 مىڭ تەڭگە پارا العان كولىك ينسپەكتورلارى 6 جىلعا سوتتالدى
ال قاراماعىنداعى ەكى قىزمەتكەرى سىبايلاس جەمقورلىققا بارعانى ءۇشىن كولىكتىك باقىلاۋ ينسپەكسياسىنىڭ باسشىسى سوگىس الدى، دەپ حابارلايدى قازاقپارات ءتىلشىسى.
س ق و سىبايلاس جەمقورلىققا قارسى قىزمەت كولىكتىك باقىلاۋ ينسپەكسياسى اۆتوكولىكتە باقىلاۋ ءبولىمىنىڭ ەكى باس مامانىنا قاتىستى قىلمىستىق ءىستى قارادى. كولىك ينسپەكتورلارى 100 مىڭ تەڭگە پارامەن ۇستالعان ەدى.
ەستەرىڭىزگە سالايىق، بىلتىر وبلىستىڭ كولىكتىك باقىلاۋ ينسپەكتسياسىنىڭ بايزاق جانە سارسەنوۆ دەگەن ەكى باس مامانى پەتروپاۆل- مامليۋتكا اۆتوجولىنىڭ كولىك باسقارۋ پۋنكتىنە تاۋلىكتىك اۋىسىمعا تۇسكەن. جۇمىس بارىسىندا ولار جاۋاپكەرشىلىگى شەكتەۋلى سەرىكتەستىكتەردىڭ بىرىنە تيەسىلى ترانزيتتىك كامازدى توقتاتىپ، 100 مىڭ تەڭگە پارا تالاپ ەتكەن. سول ءۇشىن ينسپەكتسيا ماماندارى جۇك كولىگىنىڭ كەدەرگىسىز ءجۇرىپ- تۇرۋىنا جاعداي جاساماق بولعان.
قىلمىستىق ءىس ايىپتالۋشىلاردىڭ كىناسىن تولىق مويىنداۋىنا بايلدانىستى جەدەلدەتىلگەن تارتىپتە ءوتتى. پەتروپاۆل قالالىق سوتى 8- ءساۋىر كۇنى بايزاق جانە سارسەنوۆتى مەملەكەتتىك قىزمەتتە ءومىر بويىنا قىزمەت اتقارۋ قۇقىعىنان ايىرا وتىرىپ، 6 جىلعا باس بوستاندىعىنان ايىردى.
س ق و سىبايلاس جەمقورلىققا قارسى قىزمەت باسشىسىنىڭ ءبىرىنشى ورىنباسارى نۇرلان ءجاحيننىڭ ايتۋىنشا، كولىكتىك باقىلاۋ ينسپەكسياسىندا سىبايلاس جەمقورلىقپەن كۇرەس ءتيىستى دەڭگەيدە جولعا قويىلماعان. سالدارىنان بۇل ۆەدومستۆونىڭ ماماندارى جىل سايىن پارامەن ۇستالىپ كەلەدى.
2020 -جىلى مۇقانوۆ 3 جىلعا، 2021 -جىلى وسى مۇقانوۆتىڭ تىكەلەي باستىعى ماعزۇموۆ 5 جىلعا باس بوستاندىعىنان ايىرىلدى.
«سوتقا دەيىنگى تەرگەۋ بارىسىندا كولىكتىك باقىلاۋ ينسپەكتسياسىنىڭ قىزمەتكەرلەرى جىلجىمالى باقىلاۋ پۋنكتتەرىندە كەزەكشىلىك اتقارۋ كەزىندە بەينەوجەتوندى نەمەسە موبيلدىك زياتكەرلىك باقىلاۋ قۇرالىن پايدالانبايتىندىعى انىقتالدى. وسىلايشا قىزمەتكەرلەردىڭ ارەكەتتەرى (ارەكەتسىزدىگى) اۋديو، بەينەجازبا ارقىلى تىركەلمەيدى. كولىكتىك باقىلاۋ ينسپەكسياسى باسشىلىعى جانە ارنايى قۇرالدار ارقىلى ونلاين رەجيمىندە قىزمەتكەرلەردىڭ جۇمىسىنا مونيتورينگتى جۇزەگە اسىراتىن كوميتەتتىڭ احۋالدىق ورتالىقتارى كەزەكشىلەرى تاراپىنان باقىلاۋدىڭ تولىق بولماۋى قىلمىستىق قۇقىق بۇزۋشىلىقتاردى جاساۋعا سەبەپ بولعان. جۇيەلى تۇردە جاسالىپ كەلگەن سىبايلاس جەمقورلىقتى جويۋ ءۇشىن بىرنەشە ۇسىنىمدار بەرىلدى»، - دەيدى نۇرلان جاحين.
ۇسىنىستى قاراۋ ناتيجەلەرى بويىنشا ءوزىنىڭ لاۋازىمدىق مىندەتتەرىن تيىسىنشە ورىنداماعانى ءۇشىن كولىكتەگى باقىلاۋ ءبولىمىنىڭ باس مامانى ۆ. موروزوۆ سوگىس تۇرىندە تارتىپتىك جاۋاپكەرشىلىككە تارتىلدى. قاراماعىنداعى قىزمەتكەرلەردىڭ جۇمىسىنا ۆەدومستۆولىق باقىلاۋدىڭ جوقتىعى ءۇشىن ينسپەكسيا باسشىسى ر. سەيتالين دە سوگىس تۇرىندە تارتىپتىك جاۋاپكەرشىلىككە تارتىلدى.
اۆتور اقەركە داۋرەنبەك قىزى