استانا اكىمدىگى 100 ادامعا 1 ميلليون تەڭگەدەن بەردى

استانا. قازاقپارات - استانا قالاسىنىڭ اكىمدىگى بيۋدجەتتىك مەكەمەلەردە جۇمىس ىستەيتىن 100 ادامعا 1 ميلليون تەڭگەدەن بەردى.

اتالعان اقشا يپوتەكالىق باسپانانىڭ العاشقى جارناسى رەتىندە قولدانىلۋى شارت. پاتەردى ءۇش ايدىڭ ىشىندە تابۋ قاجەت، دەپ حابارلايدى قازاقپارات ءتىلشىسى.

بۇل باستامانى استانا اكىمدىگى مەن «تۇرعىن ءۇي قۇرىلىس جيناق بانكى» قولعا الىپ وتىر. سونىڭ اياسىندا جەرگىلىكتى بيۋدجەتتەن 100 ميلليون تەڭگە ءبولىندى. ول اقشا 1 ميلليوننان 100 سالىمشىنىڭ ارنايى ەسەپشوتىنا ءتۇستى. سالىمشىلاردىڭ ىشىندە دارىگەرلەر، مۇعالىمدەر، قۇقىققورعاۋشىلار سياقتى بيۋدجەت سالاسىنىڭ قىزمەتكەرلەرى بار. ولار وزدەرىنە بولىنگەن قارجىنى العاشقى جارنا رەتىندە پايدالانۋى ءتيىس. كەلەسى جىلى ناۋرىزدىڭ اياعىنا دەيىن پاتەر تابىلماسا، اقشانى بيۋدجەتكە كەرى قايتارۋعا تۋرا كەلەدى.

 «بۇل «7-20-25» باعدارلاماسى ەمەس. دەگەنمەن، بانكتىڭ ىشكى شارتتارى سوعان ۇقساس. سالىمشى العاشقى جارنانىڭ 20 پروتسەنتىن جيناۋى ءتيىس. سودان كەيىن 7 پروتسەنتتىك يپوتەكا 25 -جىلعا بەرىلەدى. ءبىراق پاتەردى ءۇش ايدىڭ ىشىندە تاۋىپ، يپوتەكانى راسىمدەپ الۋ قاجەت. ءۇي جاڭا تۇرعىن ۇيدەن الىنۋى شارت. ايتپەسە، اكىمدىكتىڭ اقشاسى بيۋدجەتكە كەرى قايتارىلادى. ازىرشە، ول اقشا ارنايى ەسەپشوتتا جاتا بەرەدى. بارلىق شارتتار ورىندالعاننان كەيىن ەسەپشوت اشىلادى دا، العاشقى جارنا رەتىندە سالىمشىنىڭ قارجىسىنا قوسىلادى»، - دەيدى «تۇرعىن ءۇي قۇرىلىس جيناق بانكىنىڭ» استانا قالاسىنداعى ورتالىق فيليالىنىڭ ديرەكتورى جانسۇلتان ماتايەۆ.

تۇرعىن ءۇي كۋالىكتەرى بۇگىن ەلوردا اكىمدىگىندە وتكەن ارنايى جيىن بارىسىندا تابىستالدى. شاراعا قالا اكىمى باقىت سۇلتانوۆ قاتىستى.