كۇن سايىن 100-150 ادامنىڭ باسپانا ماسەلەسىن شەشىپ وتىرمىز - ءلاززات يبراگيموۆا

استانا. قازاقپارات - «قازاقستاننىڭ تۇرعىن ءۇي قۇرىلىس جيناق بانكى» 2018 -جىلى 38 مىڭنان استام ادامعا باسپانا الۋعا زاەم بەردى. بۇل تۋرالى بۇگىن ۇكىمەت ۇيىندەگى باسپا ءسوز ءماسليحاتىندا «قازاقستاننىڭ تۇرعىن ءۇي قۇرىلىس جيناق بانكى» ا ق باسقارما ءتوراعاسى ءلاززات يبراگيموۆا ايتتى،

 دەپ حابارلايدى قازاقپارات ءتىلشىسى.

 «2018 -جىلى ءبىزدىڭ بانك ارقىلى كۇن سايىن 100-150 ادام باسپانا ماسەلەسىن شەشىپ وتىردى. جالپى وتكەن جىل ءبىزدىڭ بانك ءۇشىن رەكوردتىق جىل بولدى. بانك  38250 زاەم بەردى. بۇل 38 مىڭنان استام قازاقستاندىق باسپانالى بولدى دەگەن ءسوز. ءار ءتورتىنشى زاەم «نۇرلى جەر» مەملەكەتتىك تۇرعىن ءۇي باعدارلاماسى بويىنشا بەرىلدى»، - دەدى ول.

 ونىڭ ايتۋىنشا، «نۇرلى جەر» باعدارلاماسى ارقىلى ءۇش جىلدىڭ ىشىندە 100 ميلليارد تەڭگەنىڭ زاەمى بەرىلگەن. بۇل رەتتە 2018 -جىلى  8659 بانك سالىمشىلارى مەن كەزەكتە تۇرعان ازاماتتار قونىس تويىن تويلادى.

«قازىرگى ۋاقىتتا قورجىنىمىزدا 1 ميلليون 200 مىڭنان استام دەپوزيت بار. ونىڭ ۇستىنە 150 مىڭنان استام سالىمشى - جەرگىلىكتى اتقارۋشى ورگاندارىندا كەزەكتە تۇرعان ازاماتتار»، - دەدى ءلاززات يبراگيموۆا.

اۆتور: مارلان جيەمباي