قازاقستان ورمانداردى اۆياتسيامەن شولعىنداۋعا قوسىمشا 1,8 ميلليارد تەڭگە جۇمساماق
بۇل تۋرالى بۇگىن سەناتتاعى «قازاقستانداعى بيولوگيالىق الۋان تۇرلىلىكتىڭ ساقتالۋىن زاڭنامالىق قامتاماسىز ەتۋدىڭ وزەكتى ماسەلەلەرى» اتتى ۇكىمەت ساعاتىندا ق ر ەكولوگيا، گەولوگيا جانە تابيعي رەسۋرستار ۆيتسە- ءمينيسترى ەرلان نىسانبايەۆ ايتتى، دەپ حابارلايدى قازاقپارات ءتىلشىسى.
«2018 -جىلى وبلىس اكىمدەرىمەن بىرگە 2030 -جىلعا دەيىن ورماندى مولىقتىرۋ جانە اعاش ءوسىرۋدى ارتتىرۋدىڭ قادامدىق جوسپارى بەكىتىلدى. اتالعان جوسپارلاردىڭ اياسىندا ورمانداردى مولىقتىرۋ مەن جاسىل ايماقتار قۇرۋ كولەمىن جىل سايىن 10 مىڭ گەكتارعا ارتتىرۋ كوزدەلگەن. وتكەن جىلى قايتادان قالپىنا كەلتىرگەن ورمان وسىمدىگى 52,7 مىڭ گەكتاردى قۇرادى. وسىعان بايلانىستى وبلىس اكىمدىكتەرى جوسپار اياسىندا وزدەرىنە العان مىندەتتەمەلەرىن ورىنداۋ بويىنشا شارالار قابىلداۋى قاجەت»، - دەدى ۆيتسە- مينيستر.
ونىڭ اتاپ وتۋىنشە، ورمانداردى ورتتەن قورعاۋدىڭ ەڭ ءتيىمدى شارالارىنىڭ ءبىرى القاپتاردى اۆياتسيالىق شولعىنداۋ بولىپ وتىر. بۇل رەتتە الەمنىڭ ا ق ش، كانادا، يسپانيا، وڭتۇستىك كورەيا جانە رەسەي سىندى ەلدەرى ورمان ورتىمەن كۇرەستە اۆياتسيانى كەڭىنەن قولدانۋعا ايرىقشا نازار اۋداراتىندىعى بەلگىلى.
«الەمدىك تاجىريبەنى سونىمەن قاتار ورمان ورتتەرىن انىقتاۋ جانە ولارمەن كۇرەستە اۆياتسيانى قولدانۋ تيىمدىلىگىن ەسكەرە وتىرىپ، مينيسترلىك بيىلعى جىلى اۆياتسيامەن شولعىندالاناتىن اۋماقتى 8,8 ميلليون گەكتاردان 9,5 ميلليون گەكتارعا دەيىن ۇلعايتۋدى جوسپارلادى. بۇل ۇشۋلاردى 4 مىڭ ساعاتقا دەيىن ۇلعايتادى. سونىڭ ارقاسىندا باتىس قازاقستان، قىزىلوردا جانە تۇركىستان وبلىستارىنىڭ اۋماقتارىن اۆياتسيامەن شولعىنداۋعا مۇمكىندىك تۋادى. شولعىنداۋ تەك ورمانداردى عانا ەمەس سونىمەن بىرگە جانۋارلار الەمىن قورعاۋ ءۇشىن جۇزەگە اسىرىلادى. بۇعان جىل سايىن قوسىمشا 1,8 ميلليارد تەڭگە قارجى قاجەت. اتالعان ماقساتتارعا وراي مينيسترلىك ورمانداردى اۆياتسيالىق قورعاۋ نورماتيۆتەرىنە ءتيىستى وزگەرتۋلەر ەنگىزەدى»، - دەدى ەرلان نىسانبايەۆ.
اۆتور: مارلان جيەمباي