استانادا ساپاسىز مەديتسينالىق قىزمەت كورسەتكەندەردەن 1,7 ميلليارد تەڭگە وندىرىلگەن
مۇنى بۇگىن ەلوردادا ب ا ق وكىلدەرىنىڭ قاتىسۋىمەن وتكەن بريفينگىدە «الەۋمەتتىك مەديتسينالىق ساقتاندىرۋ قورى» ك ە ا ق استانا قالالىق فيليالىنىڭ ديرەكتورى نۇرلىبەك قابدىقاپاروۆ ايتتى، دەپ حابارلايدى قازاقپارات ءتىلشىسى.
«حالىققا كورسەتىلگەن مەديتسينالىق قىزمەتتەردىڭ ساپاسى مەن كولەمىنە مونيتورينگ جۇرگىزۋ جالعاسىپ جاتىر. استانا قالاسى بويىنشا بيىلعى 10 ايدا كورسەتىلگەن مەديتسينالىق قىزمەت ساپاسى مەن كولەمىنە جۇرگىزىلگەن ءتۇرلى مونيتورينگىلەر اياسىندا 366029 كەمشىلىك انىقتالىپ، 1 ميلليارد 737 ميلليون 298 مىڭ تەڭگە ءوندىرىلدى.
ال، مونيتورينگ ناتيجەسىندە مىندەتتى الەۋمەتتىك مەديتسينالىق ساقتاندىرۋ جۇيەسىندە 359820 كەمشىلىك انىقتالىپ، 1 ميلليارد 105 ميلليون 426 مىڭ تەڭگە قاراجات ءوندىرىلدى»، - دەپ اتاپ ءوتتى نۇرلىبەك قابدىقاپاروۆ.
قوسا كەتەيىك، بۇعان دەيىن ءمامس جۇيەسىندە ەلوردالىقتاردىڭ 82 پايىزى ساقتاندىرىلعانىن حابارلاپ ەدىك. سونداي-اق، استانا تۇرعىندارى 5 جىلدا ءمامس جۇيەسىنە 157,8 ميلليارد تەڭگە اۋدارعان.