ەلىمىزدە 1- توقساندا التىن ءوندىرىسى 7,3 پايىزعا ءوستى

نۇر-سۇلتان. قازاقپارات - 2019-جىلدىڭ قاڭتار-ناۋرىز ايلارى ارالىعىندا قازاقستاندا وڭدەلمەگەن جانە جارتىلاي وڭدەلگەن نە بولماسا ۇنتاق تۇرىندەگى التىن ءوندىرىسىنىڭ كولەمى 22738 كەلىنى قۇرادى.

بۇل 2018-جىلدىڭ وسى كەزەڭىمەن سالىستىرعاندا 7,3 پايىزعا ارتىق، دەپ حابارلايدى قازاقپارات ءتىلشىسى.

ق ر ۇلتتىق ەكونوميكا مينيسترلىگى ستاتيستيكا كوميتەتىنىڭ دەرەگىنە سايكەس، ەسەپتى كەزەڭدە وڭدەلمەگەن جانە جارتىلاي وڭدەلگەن نەمەسە ۇنتاق تۇرىندەگى كۇمىس ءوندىرىسىنىڭ كولەمى 230237 كەلىگە جەتتى. بۇل وتكەن جىلمەن سالىستىرعاندا 4,9 پايىز از كورسەتكىش.

وڭدەلمەگەن اليۋميني، اليۋميني توتىعى ءوندىرىسىنىڭ كولەمى 2018-جىلدىڭ وسى كەزەڭىمەن سالىستىرعاندا 9,7 پايىز تومەندەپ، 395864 توننا بولدى. ال وڭدەلمەگەن تازارتىلعان قورعاسىن ءوندىرىسى 16,8 پايىزعا ازايىپ، 32408 توننانى، وڭدەلمەگەن مىرىش ءوندىرىسى 2,9 پايىزعا كەمىپ، 80191 توننانى قۇرادى. وڭدەلمەگەن تازارتىلعان، قوسپاسىز مىس ءوندىرۋ كولەمى 10,1 پايىزعا ءوسىپ، 114125 تونناعا جەتتى.