دەپوزيتتەرگە كەپىلدىك بەرۋ قورىنىڭ رەزەرۆ كولەمى 1,6 پايىزعا ۇلعايدى
18 مامىر 15:55

دەپوزيتتەرگە كەپىلدىك بەرۋ قورىنىڭ رەزەرۆ كولەمى 1,6 پايىزعا ۇلعايدى

نۇر-سۇلتان. قازاقپارات - قازاقستاننىڭ دەپوزيتتەرگە كەپىلدىك بەرۋ قورىنىڭ ارنايى رەزەرۆىندە جيناقتالعان قاراجاتتىڭ كولەمى جىل باسىنان بەرى 1,6 پايىزعا ۇلعايىپ، شامامەن 864 ميلليارد تەڭگە بولدى.

وتكەن جىلدىڭ سايكەس كەزەڭىمەن سالىستىرعاندا 6,6 پايىز وسكەن.

بۇل تۋرالى ق د ك ب ق ءادىسناما جانە تالداۋ باسقارماسى باسشىسىنىڭ ورىنباسارى رۋزاليا گيلمۋدينوۆا مالىمدەدى، دەپ حابارلايدى قازاقپارات.

1- مامىرداعى كورسەتكىش بويىنشا ق د ك ب ق ارنايى رەزەرۆىندە قاتىسۋشى بانكتەردىڭ جارنالارىنىڭ ۇلەسى 377,1 ميلليارد تەڭگەگە جەتتى. قوردىڭ جارعىلىق كاپيتالىنىڭ 70 پايىزىن قوسقاندا، ارنايى رەزەرۆتىڭ جيىنتىق كولەمى تۇرعىندار دەپوزيتتەرىنىڭ 6,6 پايىزىنا تەڭ.

«قازىرگى ۋاقىتتا ارنايى رەزەرۆتىڭ كولەمى زاڭنامادا بەلگىلەنگەن 5 پايىزدىق دەڭگەيدەن جوعارى جانە سالىمشىلاردىڭ شوتتارىنىڭ 99,8 پايىزىن تولىق كولەمدە قامتي الادى. ەگەر شەت مەملەكەتتەردىڭ دەپوزيتتەردى ساقتاندىرۋ قورلارىنداعى قاراجات دەڭگەيىمەن سالىستىرار بولساق، قوردىڭ ارنايى رەزەرۆىنىڭ كولەمى جەتكىلىكتى دەڭگەيدە جانە الەمدىك پراكتيكاعا سايكەس كەلەدى»، - دەدى رۋزاليا گيلمۋدينوۆا. قوردىڭ ارنايى رەزەرۆىنىڭ قاراجاتى دەپوزيتتەر بويىنشا كەپىلدىك بەرىلگەن وتەمدى تولەۋگە ارنالعان.

«ەگەر قاتىسۋشى بانك بارلىق بانك وپەراتسيالارىن جۇرگىزۋ ليتسەنزياسىنان ايىرىلار بولسا، ونىڭ سالىمشىلارىنا كەپىلدى وتەم وسى ارنايى رەزەرۆ ەسەبىنەن تولەنەدى. قازىرگى ۋاقىتتا ارنايى رەزەرۆ 20 قاتىسۋشى بانكتىڭ جارنالارى ەسەبىنەن قالىپتاسادى»، - دەدى قور تالداۋشىسى.

بانكتەردىڭ جارنالارىنان باسقا، ارنايى رەزەرۆتى قالىپتاستىرۋدىڭ نەگىزگى كوزدەرىنىڭ ءبىرى - ينۆەستيتسيالىق تابىس. ول قوردىڭ ارنايى رەزەرۆى مەن مەنشىكتى اكتيۆتەرىن ينۆەستيتسيالاۋدان تۇسەدى. كەپىلدىك بەرىلگەن وتەمدى قامتاماسىز ەتۋ ءۇشىن قوسىمشا رەتىندە قوردىڭ جارعىلىق كاپيتالىنىڭ 70 پايىزعا دەيىنگى مولشەرى پايدالانىلۋى مۇمكىن.

«وسىلايشا، قالىپتاسقان رەزەرۆ قورعا يسلام بانكتەرىن قوسپاعاندا، قازاقستاننىڭ دەپوزيتتەرگە كەپىلدىك بەرۋ جۇيەسىنە (د ك ج) قاتىسۋشى بانكتەردىڭ سالىمشىلارىنىڭ دەپوزيتتەرىن كەپىلدەندىرۋگە مۇمكىندىك بەرەدى. سالىمشىلار د ك ج قاتىسۋشى بانكتەردىڭ تىزىمىمەن قور سايتىندا تولىعىراق تانىسا الادى. قور قاراجاتىنىڭ تۇراقتى ءوسىمى د ك ج سەنىمدىلىگىن راستاي تۇسەدى»، - دەدى رۋزاليا گيلمۋدينوۆا.

بۇدان باسقا، ق ر زاڭناماسىندا رەزەرۆتىك قارجىلاندىرۋ بويىنشا قاتىسۋشى بانكتەردىڭ قوسىمشا جارنالارى سەكىلدى كومەكشى شارالار قاراستىرىلعان.

ايتا كەتەيىك، ۇلتتىق بانك BATYR BEINESI كوللەكتسيالىق مونەتالارىن اينالىمعا شىعارادى.


جاڭالىقتار