الماتى وبلىسىندا ءسىبىر ەلىگىن زاڭسىز اتقان ەر ادام 1 جىل 6 ايعا سوتتالدى
ارنايى رەيد بارىسىندا ىنتىماق اۋىلىنىڭ ماڭىنداعى اڭشىلىق القاپ اۋماعىندا قولعا تۇسكەن ازامات رەسەي فەدەراتسياسىنىڭ تۋماسى بولىپ شىقتى.
ول ءتيىستى رۇقساتى جوق بولعانىنا قاراماستان زاڭسىز اڭ اۋلاعان.
«ەر ادام ءوزىنىڭ مىلتىعىمەن 2 ءسىبىر ەلىگىن زاڭسىز اتىپ العان. وسىلايشا جانۋارلار الەمىنە 2083500 تەڭگە كولەمىندە زيان كەلتىرگەن. اتالعان فاكتى سوتقا دەيىنگى تەرگەۋدىڭ ءبىرىڭعاي تىزىلىمىنە تىركەلىپ، ق ر ق ك 337-بابى بويىنشا تەرگەلدى. بارلىق زاتتاي دالەلدەر تاركىلەندى. ۇستالعاننان كەيىن اڭشى سوت الدىندا جاۋاپ بەردى. سوت قىلمىستىق-اتقارۋ جۇيەسى مەكەمەلەرىندە جازاسىن وتەي وتىرىپ، اڭ اۋلاۋمەن اينالىسۋ قۇقىعىنان 3 جىل مەرزىمگە ايىرا وتىرىپ، 1 جىل 6 ايعا باس بوستاندىعىنان ايىرۋعا ۇكىم شىعاردى»، - دەلىنگەن الماتى وبلىستىق پوليتسيا دەپارتامەنتى باسپا ءسوز قىزمەتىنىڭ حابارلاماسىندا.
تابيعاتتى قورعاۋ پوليتسياسىنىڭ قىزمەتكەرلەرى ۇنەمى اڭ اۋلاۋ جانە بالىق اۋلاۋ ەرەجەلەرىن ساقتاۋ، براكونەرلىك فاكتىلەرىنىڭ الدىن الۋ بويىنشا رەيدتەر جۇرگىزەدى.
«بۇل ءىس-شارالار مۇددەلى ۇيىمداردىڭ وكىلدەرىمەن بىرلەسىپ وتكىزىلەدى. جىل باسىنان بەرى وبلىستا 132 قىلمىستىق ءىس قوزعالىپ، 1033 تابيعات قورعاۋ زاڭناماسىن بۇزۋ ارەكەتى انىقتالدى»، - دەدى الماتى وبلىسى پ د تابيعاتتى قورعاۋ پوليتسياسىنىڭ اعا ينسپەكتورى پوليتسيا مايورى سەرىك بايعوزينوۆ.