مەملەكەتكە قولدانىلماي جاتقان 1,5 ميلليون گا جەر قايتارىلدى - باس پروكۋراتۋرا

استانا. قازاقپارات - مەملەكەتكە قولدانىلماي جاتقان 1,5 ميلليون گا جەر قايتارىلدى.

بۇل تۋرالى باس پروكۋرور بەرىك اسىلوۆتىڭ توراعالىعىمەن جەر سالاسىنداعى زاڭدىلىقتى ساقتاۋ، سونداي- اق مەديتسينالىق بۇيىمداردى ساتىپ الۋ ماسەلەلەرى جونىندەگى القا وتىرىسىندا ايتىلدى.

بۇل تۋرالى قازاقپارات باس پروكۋراتۋرانىڭ باسپا ءسوز قىزمەتىنە سىلتەمە جاساپ حابارلايدى.

ءباسپاسوز قىزمەتىنىڭ حابارلاۋىنشا، القا جۇمىسىنا پارلامەنت ءماجىلىسىنىڭ دەپۋتاتتارى، اۋىل شارۋاشىلىعى، ەكولوگيا، گەولوگيا جانە تابيعي رەسۋرستار مينيسترلىكتەرىنىڭ باسشىلارى جانە باسقا دا مۇددەلى تۇلعالار قاتىستى.

ءبىرىنشى ماسەلە، بويىنشا باس پروكۋرور بيىل مەملەكەتكە قولدانىلماعان 1,5 ميلليون گا جەر قايتارىلعانىن اتاپ ءوتتى.

اۋىل شارۋاشىلىعى مينيسترلىگىمەن بىرلەسىپ، قوعامدىق جايىلىمداردىڭ تاپشىلىعى 29 ميلليون گا- دان 8 ميلليون گا دەيىن قىسقارتىلدى. سولتۇستىك قازاقستان، اقمولا جانە الماتى وبلىستارىندا 11 مىڭ ۇلەسكەرگە 500 مىڭ گا- دان استام جەر قايتارىلدى.

تەكسەرىستەر وليگوپوليالاردىڭ قولدانۋىنداعى ەڭ جاقسى جانە قۇنارلى اۋىلشارۋاشىلىق جەرلەرىن، جايىلىمدار مەن كوممەرتسيالىق ۋچاسكەلەردى انىقتادى. بۇگىنگى تاڭدا ولاردان مەملەكەت پايداسىنا 145 مىڭ گەكتار جەر تاركىلەندى.

تەكسەرىس قورىتىندىسى بويىنشا 56 قىلمىستىق ءىس قوزعالدى، 9 كىنالى ادام سوتتالدى.

تەكسەرۋ ناتيجەلەرى بويىنشا شىمكەنت، اقمولا، اتىراۋ، الماتى جانە تۇركىستان وبلىستارى اكىمدىكتەرىنىڭ جەر قاتىناستارى جانە اۋىل شارۋاشىلىعى بويىنشا باسقارمالارىنىڭ لاۋازىمدى تۇلعالارىنا، سونداي- اق شىعىس قازاقستان، باتىس قازاقستان، سولتۇستىك قازاقستان، ماڭعىستاۋ جانە قىزىلوردا وبلىستارىنىڭ جەكە جەر پايدالانۋشىلارىنا قاتىستى 56 قىلمىستىق ءىس قوزعالدى.

بۇگىنگى كۇنى قىلمىس جاساعان 9 ادام سوتتالدى. مىسالى، سولتۇستىك قازاقستان وبلىسىندا 800 ۇلەسكەردىڭ جەر تەلىمدەرىن اسىرا پايدالانىپ، الاياقتىق جاساعان كاسىپورىن باسشىسى 6 جىلعا باس بوستاندىعىنان ايىرىلدى.

بەرىك اسىلوۆ ۋاكىلەتتى ورگانداردىڭ جايىلىم جەرلەرىن وڭ باسقارۋدىڭ، ءىرى جەر تەلىمدەرىنىڭ ءبىر قولعا شوعىرلانۋىنا جول بەرمەۋ جانە ۇلەستىك جەرلەرگە باقىلاۋدى كۇشەيتۋدىڭ، ونىڭ ىشىندە كەز كەلگەن زاڭسىز سحەمالاردى بولدىرماۋ جۇمىسىنىڭ ماڭىزدىلىعىنا نازار اۋداردى.

اۋىل شارۋاشىلىعى مينيسترلىگىنە ناقتى ءىس- شارالار جوسپارىن دايىنداۋ ارقىلى زاڭ بۇزۋشىلىقتاردى جويۋ تۋرالى تالاپتار قويىلدى.

ەكىنشى ماسەلە بويىنشا «دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعىنىڭ» قىزمەتى تەكسەرىسىنىڭ ناتيجەلەرى تالقىلاندى.

پروكۋرورلىق تەكسەرىس كەزىندە بيۋدجەت قاراجاتىن جىمقىرۋ جانە جوعارى باعامەن ساپاسىز مەديتسينالىق تەحنيكانى ساتىپ الۋ فاكتىلەرى انىقتالدى.

ماسەلەن، اقتوبە وبلىسىنداعى مەديتسينالىق ورتالىق جىلجىمالى شۇعىل مەديتسينالىق كومەك كەشەنىن (جەدەل جاردەم) كەدەندىك قۇنىنان 4 ەسە ارتىق باعامەن ساتىپ الىنعان. نارىقتىق باعاسى 16,6 ملن تەڭگە بولسا، ورتالىققا 72,9 ميلليون تەڭگە جۇمسالعان.

وسىنداي سىزبالار الماتى قالاسىندا، اقمولا، اتىراۋ، قاراعاندى، قوستاناي، ش ق و، ب ق و، جامبىل جانە پاۆلودار وبلىستارىندا ورىن العان.

تەكسەرىس ناتيجەلەرى بويىنشا پروكۋراتۋرا زاڭ بۇزۋشىلىقتارىن جويۋ تۋرالى 208 ۇسىنۋ ەنگىزدى، 405 ادام تارتىپتىك جانە اكىمشىلىك جاۋاپقا تارتىلدى، 15 سوتقا دەيىنگى تەرگەپ- تەكسەرۋ باستالدى.

قاداعالاۋ ۆەدومستۆوسىنىڭ باسشىسى مەديتسينالىق بۇيىمدارعا باعانى قالىپتاستىرۋدىڭ اشىقتىعىن قامتاماسىز ەتۋ، سىبايلاس جەمقورلىق فاكتورلارىن بولدىرماۋ قاجەتتىگىن اتاپ ءوتتى.

كاسىپكەرلەردىڭ وتىنىمدەرىن قابىلداۋ پروتسەسىن اۆتوماتتاندىرۋ، مەديتسينالىق بۇيىمداردى ساراپتاۋ تەتىگىن قايتا قاراۋ، مەديتسينالىق جابدىقتاردى قاداعالاۋ جۇيەسىن ەنگىزۋ ۇسىنىلدى.

«القا جۇمىسىنىڭ قورىتىندىسى بويىنشا باس پروكۋرور وبلىس پروكۋرورلارىنا مەملەكەتكە كەلتىرىلگەن زالالدى وتەۋگە قول جەتكىزۋدى جانە جىمقىرۋ مەن بيلىكتى اسىرا پايدالانۋ جاساعان ادامدار ءۇشىن قىلمىستىق جازانىڭ بۇلتارتپاستىعى قاعيداتىن قامتاماسىز ەتۋدى تاپسىردى»، - دەلىنگەن باس پروكۋراتۋرانىڭ باسپا ءسوز قىزمەتى تاراتقان حابارلامادا.