قازاقستاندا ءبىر ايدا 1,5 مىڭنان استام زاڭسىز قوقىس ءۇيىندىسى انىقتالدى

None
نۇر-سۇلتان. قازاقپارات - قازاقستاندا جىل سايىن 4,5 ميلليون تونناعا جۋىق تۇرمىستىق قاتتى قالدىقتار شىعارىلادى، ال رۇقسات ەتىلمەگەن قوقىس ورىندارىنىڭ ۇلەسى وتكەن جىلى 7400 گە جەتتى.

بۇل تۋرالى ق ر ەكولوگيا، گەولوگيا جانە تابيعي رەسۋرستار ۆيتسە-ءمينيسترى ءزۇلفيا سۇلەيمەنوۆا ايتتى، دەپ حابارلايدى قازاقپارات ءتىلشىسى.

«قازاقستاندا جىل سايىن 4,5 ميلليون تونناعا جۋىق تۇرمىستىق قاتتى قالدىقتار شىعارىلادى. 2021-جىلى قايتا وڭدەۋ مەن كادەگە جاراتۋ ۇلەسى ءوسىپ، %21,1 بولدى. دەگەنمەن، قالدىقتاردىڭ پايدا بولۋ كولەمىن ەسكەرسەك، بۇل كورسەتكىش جەتكىلىكسىز»، - دەدى ءزۇلفيا سۇلەيمەنوۆا ەلوردادا Green energy and waste recycling forum جيىنىندا.

سپيكەر زاڭسىز پوليگونداردى انىقتاۋ ءۇشىن ەكولوگيا مينيسترلىگى «قازاقستان عارىش ساپارى» كومپانياسىمەن بىرگە جۇمىس ىستەپ جاتقانىن ايتتى.

سونداي-اق، وتكەن جىلى قازاقستاندا 7400 گە جۋىق زاڭسىز قوقىس ءۇيىندىسى انىقتالعانىن، ولاردىڭ كوپشىلىگى جويىلعانىن ايتتى. ودان بولەك، ءزۇلفيا سۇلەيمەنوۆا بيىلعى زاڭسىز قوقىس كورسەتكىشتەرىنە دە توقتالدى.

«بيىل مامىر ايىنىڭ باسىندا رۇقسات ەتىلمەگەن پوليگونداردى انىقتاي باستادىق. ماۋسىم ايىنىڭ ورتاسىنا دەيىن شامامەن مىڭ جارىمنان استام رۇقسات ەتىلمەگەن قوقىس ورىندارى انىقتالدى. مۇنىڭ ءبارى ماسەلەنىڭ قانداي اۋقىمدى ەكەنىن كورسەتەدى. جەرگىلىكتى جانە اتقارۋشى ورگاندارمەن بىرگە قوقىس تاستايتىن جەرلەردى جويۋ جۇمىستارىن جۇرگىزىپ جاتىرمىز. بۇل پوليگوندار مەن قالدىقتار پايدا بولماس ءۇشىن ءبىز نە ىستەي الاتىنىمىزدى جانە نە ىستەۋىمىز كەرەك ەكەنىن قاراستىرۋىمىز قاجەت»، - دەدى ۆيتسە-مينيستر.

فورۋم بارىسىندا زۋلفيا سۇلەيمەنوۆا 2030-جىلعا دەيىن جاسىل ەكونوميكاعا كوشۋ جونىندەگى تۇجىرىمداماعا ءبىرقاتار ينديكاتور مەن كورسەتكىش ەنگىزىلگەنىن، ونىڭ ىشىندە قالدىقتاردى قايتا وڭدەۋ ۇلەسىن 2030-جىلعا قاراي %40 عا جانە 2050-جىلعا قاراي %50 عا جەتكىزۋ بار ەكەنىن ەسكە سالدى.

«ءبىرقاتار شارا قابىلدادىق. جاڭا ەكولوگيالىق كودەكس ازىرلەندى، ول 2021-جىلعى 1- شىلدەدەن باستاپ كۇشىنە ەندى. قالدىقتاردى قاۋىپسىز باسقارۋدى ۇيىمداستىرۋدىڭ نەگىزىن قالادىق. ءبىرىنشى كەزەكتە، فراكسيالار بويىنشا قالدىقتاردى بولەك جيناۋعا قويىلاتىن تالاپتار بەلگىلەندى. قالدىقتاردىڭ قوزعالىسىن باقىلاۋ ءۇشىن ولاردى تۇگەندەۋ تۋرالى ەسەپتى وڭتايلاندىردىق. قالدىقتاردى باسقارۋ جۇيەسىنىڭ نەگىزگى وتكىزۋشىسى - جەرگىلىكتى اتقارۋشى ورگاندار. ءبىز ولارعا قۇزىرەتتەردىڭ ءبىر بولىگىن بەردىك. سونىمەن قاتار، ءاربىر جەرگىلىكتى اتقارۋشى ورگان وزىندە قالدىقتاردى باسقارۋ باعدارلاماسىن ازىرلەۋى ءتيىس»، - دەپ ءتۇسىندىردى ول.

سوڭعى جاڭالىقتار