«التىن وردا» بازارىنىڭ يەلەرى 1,5 ميلليارد تەڭگە سالىق تولەدى - كوميتەت
16 مامىر 19:13

«التىن وردا» بازارىنىڭ يەلەرى 1,5 ميلليارد تەڭگە سالىق تولەدى - كوميتەت

نۇر-سۇلتان. قازاقپارات - «التىن وردا» بازارىندا ساۋدا جاسايتىن 2993 ازامات كاسىپكەر رەتىندە تىركەلدى.

بۇل تۋرالى مەملەكەتتىك كىرىستەر كوميتەتى مالىمدەدى، دەپ حابارلايدى قازاقاپارات.

«مەملەكەت باسشىسىنىڭ الماتى وبلىسىنداعى «التىن وردا» بازارىنىڭ قىزمەتىن رەتكە كەلتىرۋگە قاتىستى تاپسىرماسىنا سايكەس ءبىرقاتار باقىلاۋ شارالارى جۇزەگە استى. ساۋدا ورتالىعىندا جۇمىس ىستەيتىن 2993 ازامات كاسىپكەر رەتىندە تىركەلدى. ونىڭ ىشىندە اقپاندا – 1371، ناۋرىزدا – 1443، ساۋىردە 179 ادام جەكە كاسىپكەرلىك قۇجاتىن الدى. بۇرىننان تىركەلىپ، جۇمىس ىستەپ وتىرعان جەكە كاسىپكەرلەر مەن زاڭدى تۇلعالاردى قوسا ەسەپتەسەك، قازىرگى ۋاقىتتا جالپى سانى 3324 سۋبەكتى بار. بۇرىن بازار اۋماعىندا ساۋدا جاسايتىن 331 سالىق تولەۋشى ەسەپتە تۇرعان»، - دەپ جازدى ۆەدومستۆودان.

تاعى بەلگىلى بولعانى، باقىلاۋ شارالارى بازاردى جالعا الۋشى «Altyn Orda QazTrade Ltd» ج ش س جانە بازار يەسى «KURYLYS LTD» - «كۋرىلىس ل ت د» ج ش س- نا قاتىستى جۇرگىزىلگەن.

قولدانىلعان شارالاردىڭ ناتيجەسىندە بيۋجەتكە 1,5 ميلليارد تەڭگە سالىق تولەندى، ونىڭ ىشىندە «Altyn Orda QazTrade Ltd» ج ش س 1,4 ميلليارد تەڭگە سالىق تولەگەن، «KURYLYS LTD» - «كۋرىلىس ل ت د» ج ش س- ءى - 92,3 ميلليون تەڭگە بيۋجەتكە اۋدارعان.

«ودان بولەك، قولدانىلعان شارانىڭ ناتيجەسىندە «Altyn Orda QazTrade Ltd» ج ش س مەن «KURYLYS LTD» - «كۋرىلىس ل ت د» ج ش س- ىنا كامەرالدىق باقىلاۋ بويىنشا جالپى سوماسى 1,3 ميلليارد تەڭگەگە حابارلامالار قويىلىپ، 1,1 ميلليارد تەڭگە قوسىمشا سالىق ەسەپتەلدى. قازىرگى ۋاقىتتا ونىڭ 650 ميلليون تەڭگەسى بيۋجەتكە ءوندىرىلدى»، - دەپ تولىقتىردى كوميتەتتەن.

سونىمەن قاتار، قازىرگى ۋاقىتتا «Altyn Orda QazTrade Ltd» ج ش س مەن بازار يەسى «KURYLYS LTD» - «كۋرىلىس ل ت د» ج ش س- نا قاتىستى سالىقتىق تەكسەرۋلەر جۇرگىزىلۋدە.

جاڭالىقتار