تارازدا 1,5 ميلليارد تەڭگەگە جاعالاۋداعى دەمالىس ورنى اشىلماق

None
None
تاراز. قازاقپارات - تاراز قالاسىنداعى «زەربۇلاق» كولىنىڭ جاعالاۋىندا جوعارى دەڭگەيلى دەمەلىس ورنى اشىلاتىن بولادى.

وبلىس اكىمى بەردىبەك ساپاربايەۆ كولگە ارنايى بارىپ، جوسپارلى جوبالارمەن تانىسىپ، نىساننىڭ ىرگەستاسىن قالاۋ شاراسىنا قاتىستى، دەپ حابارلايدى قازاقپارات ءتىلشىسى.

قالا ورتالىعىندا ورنالاسقان كول كەڭەس كەزەنىندە «كومسومول» اتىمەن تانىلىپ، جامبىلدىقتاردىڭ سۇيىكتى دەمالىس ورنىندارىنىڭ ءبىرى بولاتىن. الايدا ۋاقىت وتە كولدىڭ توزىعى جەتىپ، قاراۋسىز قالعانى جاسىرىن ەمەس. باس مەردىگەر «South holiday» ج ش س 1,5 ميلليارد تەڭگە سالىپ، ءدال سول اۋماقتان جايلى جانە ءار ءتۇرلى باعىتتاعى دەمالىس ايماعىن اشپاق. جوبا الەۋمەتتىك باعىتتا ىسكە اسادى، تەك مەيرامحانا مەن ءۇش باسسەين ورنالاسقان نىسانعا عانا اقىلى تۇردە كىرۋ قاراستىرىلماق. جالپى، كەشەن ءتورت ايماقتان تۇرادى. وندا كولدىڭ ءوزىنىڭ تاماشا جاعاجايى جانە قايىقتار مەن كاتامارانداردى جالعا بەرۋگە ارنالعان ورىن، تاماشا كورىنىس بەرەتىن پيرسپەن قامتىلعان ورتالىق اللەيا جانە جاقىن جەردە ورنالاسقان سپورت الاڭشالارى، ارنايى بالىق اۋلاۋ ايماعى دا قاراستىرىلعان. سونداي- اق بالالار الاڭدارى، قارتتار ءۇشىن دەمالىس ورىندارى اشىلىپ، ساكىلەر ورنالاستىرىلادى.

جوبا 2023 -جىلدىڭ ەكىنشى توقسانىندا تولىق اياقتالادى دەپ كۇتىلۋدە. مەردىگەر ءبىرىنشى كەزەڭدە كولدى تازارتۋمەن اينالىسادى، ونىڭ ءتۇبىن ارنايى گەومەمبرانامەن قاپتاپ، تاس توسەمەك. جاعاجايعا تازا قۇم اكەلىنىپ، سۋبۇرقاقتار ورناتىلادى. سونداي- اق، ورتالىق اللەيا تولىق اباتتاندىرىلىپ، ءتۇرلى باعالى اعاش كوشەتتەرى وتىرعىزىلادى.

«جۇمىس كەستەسىن جاساڭىزدار، ونىڭ ورىندالۋىن تاراز قالاسى اكىمدىگى باقىلايتىن بولادى. قۇرىلىس جۇمىستارىن جۇرگىزۋ بارىسىندا تابيعاتقا زيان كەلمەۋىنە اسا كوڭىل ءبولۋ قاجەت»، - دەدى بەردىبەك ساپاربايەۆ.

سوڭعى جاڭالىقتار