ەندى 1-5-سىنىپ وقۋشىلارى ارالاس فورماتتا وقۋعا كوشىرىلدى

نۇر-سۇلتان. قازاقپارات - 1-ناۋرىزدان باستاپ 1-5-سىنىپتارداعى وسىعان دەيىن كەزەكشىلىك سىنىپتا وقىتىلىپ كەلە جاتقان وقۋشىلار ارالاس فورماتتا وقۋعا كوشىرىلدى.

بۇل تۋرالى ورتالىق كوممۋنيكاتسيالار قىزمەتىندە وتكەن ورتا جانە جوعارى ءبىلىم بەرۋگە قاتىستى ماڭىزدى سۇراقتار تۋرالى بريفينگىدە ايتىلدى، دەپ حابارلايدى قازاقپارات ءتىلشىسى.

«بۇگىنگى كۇنى وقۋ پروتسەسىن ۇيىمداستىرۋعا بايلانىستى وزگەرىستەر ەنگىزىلدى. ەلىمىزدەگى باس سانيتارلىق دارىگەردىڭ قاۋلىسىنا سايكەس، 1-ناۋرىزدان باستاپ 1-5-سىنىپتار اراسىنداعى وسىعان دەيىن كەزەكشىلىك سىنىپتا وقىتىلىپ كەلە جاتقان وقۋشىلار ارالاس فورماتتا وقۋعا كوشىرىلدى. بۇل - جالپى ءبىلىم بەرەتىن مەكتەپتەردە 1-5-سىنىپتار جانە حالىقارالىق مەكتەپتەردە 1-7-سىنىپتار»، - دەيدى ءبىلىم جانە عىلىم ۆيتسە-ءمينيسترى شولپان كارينوۆا.

ونىڭ ايتۋىنشا، قازىرگى ۋاقىتتا وقۋشىلاردىڭ %47 ى شتاتتىق رەجيمدە، %53 ى قاشىقتان وقۋ فورماتىندا ءبىلىم الىپ جاتىر.

«وڭىردەگى سانيتارلىق- ەپيدەميولوگيالىق جاعدايلارعا بايلانىستى شاتتىق نەمەسە قاشىقتان وقىتاتىن پاندەردى ءار ءبىلىم مەكەمەسى وزدىگىنشە دەربەس انىقتاۋعا قۇقىلى. سونىمەن قاتار، ءبىلىم جانە عىلىم مينيسترلىگى نەگىزگى پاندەردى وقۋشىلاردىڭ مەكتەپكە كەلۋىمەن شتاتتىق رەجيمدە وقىتىپ، كوركەم ەڭبەك، مۋزىكا پاندەرىن قاشىقتىق فورماتتا جالعاستىرۋدى ۇسىنىپ وتىر. وسى بويىنشا ءتيىستى ادىستەمەلىك ۇستانىمدار جاسالىپ، ءبىلىم مەكەمەلەرىنە جەتكىزىلدى. ءار ءبىلىم مەكەمەسى وسى وقۋ جىلىنا بەكىتىلگەن وقىتۋ جوسپارىنا بايلانىستى ءوز جوسپارلارىمەن وقىتۋدى باستادى»، - دەيدى ول.

اۆتور: زارينا قاھارمان