ەلوردادا 1,5 مىڭ مەديتسينا قىزمەتكەرىنە سىياقى بەرىلدى

نۇر-سۇلتان. قازاقپارات - نۇر-سۇلتان قالاسىندا كوروناۆيرۋس ىندەتىمەن كۇرەسىپ جاتقان مەديتسينا ماماندارىنا سىياقى بەرىلدى، دەپ حابارلايدى قازاقپارات.

«ەلوردادا 1,5 مىڭعا جۋىق مەديتسينا قىزمەتكەرى كوروناۆيرۋسپەن كۇرەسىپ جاتىر. مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس مەديتسينا قىزمەتكەرلەرىنە سىياقى بەرىلدى. ەلباسىنىڭ تاپسىرماسىنا بويىنشا «ءبىز بىرگەمىز» قورىنان كوروناۆيرۋسپەن اۋىرعان پاتسيەنتتەرمەن تىكەلەي بايلانىستا جۇمىس ىستەپ جاتقان مەديتسينا قىزمەتكەرلەرىنە قوسىمشا قاراجات ءبولىندى»، - دەلىنگەن قالا اكىمدىگىنىڭ رەسمي سايتىندا.

بۇعان دەيىن حابارلاعانىمىزداي، ەلوردادا كوروناۆيرۋسپەن كۇرەسىپ جاتقان مەديتسينا قىزمەتكەرلەرى قوناقۇيلەرگە ورنالاستىرىلىپ، تاماقپەن كولىكپەن قامتاماسىز ەتىلدى.

ەمحانالار مەن اۋرۋحانالاردا جۇمىس ىستەيتىن دارىگەرلەر ءۇشىن دە كولىك ۇيىمداستىرىلعان. كولىكتى CTS كومپانياسى ۇسىندى.

ق ر پرەزيدەنتى ق. توقايەۆتىڭ تاپسىرماسىن ورىنداۋ اياسىندا مەديتسينا قىزمەتكەرلەرىنە جالاقىمەن قوسا، اي سايىن ۇستەمەاقى بەرىلىپ وتىرادى.

تولەمدەر كوروناۆيرۋستى جۇقتىرۋ قاۋپى بار ءۇش توپ بويىنشا 3 اي بويى جۇرگىزىلەدى: «قاۋىپتىلىگى اسا جوعارى» — رەانيماتسيا بولىمشەلەرىن قوسا العاندا، ينفەكتسيالىق ستاتسيونارلاردىڭ دارىگەرلەرى، ورتا جانە كىشى مەديتسينا قىزمەتكەرلەرى.

ۇستەمە اقى 20 ەڭ تومەنگى جالاقىنى قۇرايدى (جالاقىنىڭ ەڭ تومەنگى مولشەرى (ج ت م)، 850 مىڭ تەڭگە). «قاۋىپتىلىگى جوعارى» - پروۆيزورلىق ستاتسيونارلار مەن جەدەل جاردەم دارىگەرلەرى، ورتا جانە كىشى مەديتسينا قىزمەتكەرلەرى.

ۇستەمە اقى 10 ج ت م (425 مىڭ تەڭگە) قۇرايدى. «قاۋىپتىلىگى ورتاشا» - كارانتيندىك ستاتسيونارلارداعى دارىگەرلەر، ورتا جانە كىشى مەديتسينا قىزمەتكەرلەرى، سانيتارلىق دارىگەرلەر (مەملەكەتتىك قىزمەتكەرلەر)، جەدەل جاردەم جۇرگىزۋشىلەرى جانە ت. ب. ۇستەمە اقى 5 ج ت م (212,5 مىڭ تەڭگە) قۇرايدى.