كاسپي تەڭىزىنىڭ دەڭگەيى 1,5 مەترگە تومەندەدى
ەگەر وسىلاي جالعاسا بەرسە، تاياز جەرلەر قۇرعاپ، تۇزعا اينالادى. كليمات وزگەرەدى. اينالاداعى حالىقتىڭ تۇرمىس-تىرشىلىگى قيىندايدى، - دەيدى ەكولوگتار. سوندىقتان تەڭىزدى ساقتاپ قالۋدىڭ جولدارىن تابۋ قاجەت. عىلىمي-زەرتتەۋ ينستيتۋتىن قۇرىپ، ەكو جۇيەگە كەرى اسەر ەتىپ جاتقان فاكتورلاردى انىقتاۋعا نازار اۋدارىلۋى ءتيىس.
ماڭعىستاۋدا حالىقتىڭ كوپ بولىگى تەڭىز جاعاسىندا تۇرادى. سۋ دەڭگەيىنىڭ تومەندەۋىنەن بولاتىن زارداپتى ءبىرىنشى سولار تارتادى. ويتكەنى، قازىر وبلىس تۇرعىندارىنىڭ 57 پايىزى تۇشىتىلعان تەڭىز سۋىن تۇتىنىپ وتىر. ال، كاسپيدى جاعالاي ورنالاسقان 5 مەملەكەتتى قوسا العاندا 25 ميلليونداي حالىقتىڭ ءومىرى تەڭىزبەن بايلانىستى.
«اينالاسىندا ءومىر ءسۇرىپ وتىرعان حالىقتىڭ تۇرمىس-تىرشىلىگى قيىنداي تۇسەتىنى شىندىق. بيورەسۋرستار، بالىق كولەمىنىڭ ازاياتىنى ءسوزسىز. تەڭىزدىڭ ازايۋى كليماتتىڭ وزگەرۋىنە اسەر ەتەدى»، - دەيدى ەكولوگ ورىنباسار توعجانوۆ.
مامانداردىڭ ايتۋىنشا، تەڭىز سوڭعى 15 جىلدا 1,5 مەترگە تومەندەدى. 5 جىلدان بەرى توقتاۋسىز تارتىلىپ جاتىر. ورتا ەسەپپەن جىلىنا 7 سانتيمەترگە ازايادى. الداعى 3 جىلدا تاعى دا 40 سانتيمەترگە تومەندەيدى دەگەن بولجام بار.
«كەيبىر جىلدارى مىسال ءۇشىن 2005 تەن 2008 گە دەيىن جەدەل قارقىنمەن تۇسكەن بولسا، 2008 دەن 2011 گە دەيىن شامالى باسەڭدەدى. ال، 2011 دەن بەرى قاراي تاعى دا قارقىنى كۇشەيدى، ءسويتىپ ءبىر جىلدارى كوپ، ءبىر جىلدارى از. ءبىراق، جالپى ەسەپتەگەندە ءبارىبىر تەڭىز دەڭگەيى تومەن قاراي ءتۇسىپ كەلەدى»، - دەيدى «قازگيدرومەت» ر م ك ماڭعىستاۋ وبلىستىق فيليالى ديرەكتورىنىڭ ورىنباسارى نۇرلان سارسەنبايەۆ.
ەكولوگتار تەڭىز دەڭگەيىنىڭ تومەندەۋىن وعان قۇياتىن وزەندەردەگى سۋدىڭ ازايۋىمەن تۇسىندىرەدى. ماسەلەن، نەگىزگى كۇرەتامىر ەدىل مەن جايىق وزەندەرىنىڭ ءوزى تايازدانىپ كەتتى. تەڭىز سۋىنىڭ ازايۋىنا جاۋىن- شاشىننىڭ دا از ءتۇسۋى سەبەپ.
«كاسپي تەڭىزىنىڭ ماسەلەلەرى بويىنشا عىلىمي-زەرتتەۋ ينستيتۋتىن قۇرۋ قاجەت. سەبەبى، قازىر ءجۇرىپ جاتقان پروتسەستەرگە عىلىم جاۋاپ بەرۋى ءتيىس. مىسالى، ماسەلەنىڭ ءبىرى، يتبالىقتاردى ساقتاپ قالۋ ءۇشىن، ناقتى عىلىمي دەرەكتەر مەن كورسەتكىشتەرگە سۇيەنىپ، جوسپار جاساقتالۋى قاجەت»، - دەيدى «ەكو-ماڭعىستاۋ» ۇ ە ۇ ديرەكتورى كيريلل وسين.