قازاقستان 1,5 مىڭ ادامعا حالىقارالىق ىزدەۋ جاريالادى
جالپى وتىرىس بارىسىندا دەپۋتاتتار قازاقستان سوت تورەلىگىنەن جاسىرىنىپ جۇرگەن ادامداردىڭ جالپى سانى تۋرالى سۇرادى. سونىمەن قاتار، كۇدىكتى ادامداردى ۇستاپ بەرۋ تۋرالى ەكىجاقتى كەلىسىمدەر جوق ەلدەرمەن ءوزارا ءىس-قيمىلداردىڭ ءتارتىبى قالاي جۇرەتىندىگى تۋرالى ساۋال قويىلدى.
«جالپى بىزدە 1499 ادام حالىقارالىق ىزدەۋدە ءجۇر، ال 1026 مەملەكەتارالىق ىزدەۋدە قامتىلعان»، - دەدى ا. لۋكين.
ونىڭ اتاپ وتۋىنشە، ەكىجاقتى كەلىسىم بولماعان جاعدايدا تاراپتار ءوزارا ۋاعدالاستىق تارتىبىندە ءتيىستى شەشىمگە كەلەدى.
«مۇنداي تاجىريبەنى كوپتەگەن ەلدەرمەن كەڭىنەن پايدالانىپ كەلەمىز، ونىڭ ىشىندە ەۋروپالىق ەلدەرمەن دە ىسكە اسىرىلۋدا. اتاپ ايتقاندا، گەرمانيامەن اراداعى ءىس-قيمىل اياسىندا وتكەن جىلى ولار بىزگە ءۇش ادامدى ۇستاپ بەردى. سونىمەن قاتار، ءبىز ءتيىستى كونۆەنتسيالاردى نەگىزگە الامىز، ونىڭ ىشىندە مينسك كونۆەنتسياسى بار»، - دەدى اندرەي لۋكين.
ايتا كەتەيىك، ءماجىلىستىڭ جالپى وتىرىسىندا «قازاقستان رەسپۋبليكاسى مەن يوردان حاشيميت كورولدىگى اراسىنداعى ادامداردى ۇستاپ بەرۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى ماقۇلداندى.