سلاۆيان بازارى: «امىرە» 1,5 ميلليون تەڭگەلىك كوستيۋمىن پولشا انشىسىنە سىيلادى

None
None
استانا. قازاقپارات - «سلاۆيان بازارى» حالىقارالىق ونەر فەستيۆالىندە قازاقستاننىڭ اتىنان ونەر كورسەتىپ، 1-ورىن العان ەرنار سادىربايەۆ استانادا باسپا ءسوز ءماليحاتىن وتكىزدى، دەپ حابارلايدى قازاقپارات ءتىلشىسى.

ءانشىنىڭ پروديۋسەرى جان مۇقانوۆ بايقاۋدا بولعان قىزىقتى وقيعالاردى ايتىپ بەردى.

«بايقاۋدىڭ سوڭعى كۇنى «امىرە» قۇنى ءبىر جارىم ميلليون تەڭگە بولاتىن قىمبات كوستيۋم كيىپ شىقتى. كوستيۋمنىڭ ادەمىلىگى سونشا، ساحنا سىرتىندا بارلىق ارتىستەر ۇستاپ كورىپ، فوتوعا ءتۇسىپ جاتتى. سول كۇنى امىرە ساحناعا تۋمەن شىعۋعا بولا ما دەپ رۇقسات سۇرادى. مەن ونىڭ كوستيۋمى كورىنبەي قالادى دەپ ۋايىمداپ تۇرمىن (كۇلدى- اۆت.). «ەسەسىنە تۋىمىز كورىنەدى» دەپ جاۋاپ بەردى ەرنار سادىربايەۆ. وسىلايشا، «امىرە» ون بەس قاتىسۋشىنىڭ اراسىندا تۋمەن شىققان جالعىز قاتىسۋشى بولدى. ال قىمبات كوستيۋمدى قازاقستانعا اكەلۋ بۇيىرمادى، قازىر بىزدە جوق»، - دەپ ەسكە الدى جان مۇقانوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

پروديۋسەردىڭ ايتۋىنشا، باعالى كوستيۋم قازاقستاندىق قىزمەتكەرمەن رەنجىسىپ قالعان پولشا انشىسىنە سىيعا بەرىلگەن.

«ءادىلقازى القاسىندا 2000-جىلدارى باس جۇلدە العان، پولشا ەلىنەن كەلگەن ءانشى بولدى. ءبىز ونى العاش رەت كوردىك، ءبىراق ونى تۇتاس ەۋروپاعا تانىمال ءانشى دەيدى. سول ءارتىس «كوستيۋمىڭىزدى ساتىڭىز» دەپ ەرنارعا جابىستى. ءبىز ساتقان جوقپىز. بايقاۋ اياقتالىپ، ەلگە جينالىپ جاتقاندا، كىشىگىرىم ارازداستىق بولدى. قازاقستاندىق قىزمەتكەرلەردىڭ ءبىرى پولشا انشىسىمەن ارازداسىپ، قاتتى سوزدەر ايتىپتى. «امىرە» كەشىرىم رەتىندە كوستيۋمدى سىيلايىق دەپ ۇسىنىس ءبىلدىردى. قىمبات كوستيۋم، ارينە، ءبىراق پولشا انشىسىنە سىيلادىق. ءانشىنىڭ قۋانىشىندا شەك بولمادى»، - دەدى ول.

سونىمەن بىرگە، پروديۋسەر ەرنار سادىربايەۆپەن قالاي تانىسقانىن ايتىپ بەردى.

«امىرەمەن» كەزدەيسوق تانىستىم. «سالەم، ۇلى دالا» جوباسىنا پرومو-روليك ازىرلەپ جاتقاندا جوبا ءانۇرانىن ايتاتىن ءانشى قاجەت بولدى. سول كەزدە امىرەنىڭ ءان ايتقانىن كوردىم. كەيىن مەتروعا تۇسكەندە، قولما-قول اقشا تاپپاي قالدىم، كارتاداعى اقشامدى ەش جەر قابىلدامادى. سوندا «امىرە» مەن ءۇشىن 100 تەڭگە تولەدى. وسىلايشا، ءبىر مەترو بيلەتىمەن مەنى ساتىپ الدى (كۇلدى- اۆت.). شىن مانىندە، ول (ەرنار سادىربايەۆ- اۆت.) قوستاناي وبلىسىندا تۋعان قاراپايىم جىگىت، ەڭ باستىسى وتە دارىندى جىگىت»، - دەدى جان مۇقانوۆ.

ايتا كەتەيىك، «سلاۆيان بازارى» حالىقارالىق ونەر فەستيۆالى بەلارۋس مەملەكەتىن دۇنيەجۇزىنە تانىمال ەتتى. 2015-جىلى بۇل بايقاۋدا قازاقستاندىق ديماش قۇدايبەرگەن باس جۇلدەنى يەلەنگەن بولاتىن.

بيىل قازاقستان اتىنان ونەر كورسەتىپ، جۇلدەلى 1-ورىن العان ەرنار سادىربايەۆ اۋەلى نۇرعيسا تىلەنديەۆتىڭ «قۇستار ءانىن» شىرقادى. ەكىنشى كۇنى وركەستردىڭ سۇيەمەلدەۋىمەن رايان پوۋستىڭ «پودبەري مۋزىكۋ» جانە روكوپەرا موتسارتتىڭ «يا سپليۋ نا روزاح» اتتى شىعارمالارىن ورىندادى.

سوڭعى جاڭالىقتار