بيىلعى ءۇش ايدا 1,4 ميلليون قازاقستاندىق شەت مەملەكەتتەرگە ساياحاتتادى

استانا. قازاقپارات - بيىلعى ءۇش ايدا 1,4 ميلليون قازاقستاندىق شەت مەملەكەتتەرگە ساپارلادى. بۇل وتكەن جىلدىڭ سايكەس كەزەڭىمەن سالىستىرعاندا %66 جوعارى (2022-جىلعى قاڭتار-ناۋرىز - 845,2 مىڭ ادام).

قازاقپارات بۇل تۋرالى ۇلتتىق ستاتيستيكا بيۋروسىنا سىلتەمە جاساپ حابارلايدى.

بۇل رەتتە قازاقستانعا 1,1 ميلليون تۋريست كەلگەن. بۇل كورسەتكىش 2022-جىلعى قاڭتار- ناۋرىزبەن سالىستىرعاندا 3,9 ەسە جوعارى (2022-جىلعى قاڭتار- ناۋرىز - 293,2 مىڭ ادام).

ەل ىشىندەگى تۋريزمگە كەلسەك، بيىلعى العاشقى ءۇش ايدا 1,3 ميلليون ادام (2022-جىلى - 1,1 ميلليون ادام) ەل وڭىرلەرىن ساياحاتتاعان.

قازاقستاندا تۋريستەردى ورنالاستىراتىن 3848 ورىن بار. وتكەن جىلدىڭ ءبىرىنشى توقسانىمەن سالىستىرعاندا ولاردىڭ سانى 92 گە ارتتى. بۇل رەتتە قىزمەت كورسەتىلگەن دەمالۋشىلار سانى 1,5 ميلليون ادامدى قۇرادى.

كۋرورتتى ايماقتاردا 703 مىڭنان استام ادام دەمالدى. قاڭتار-ناۋرىزدا ورنالاستىرۋ ورىندارى كورسەتكەن قىزمەت كولەمى 43,1 ميلليارد تەڭگەنى قۇرادى، بۇل دا وتكەن جىلدىڭ سايكەس كەزەڭىمەن سالىستىرعاندا %64,8 جوعارى.

ايتا كەتەيىك، قازاقستاندا 5 جۇلدىزدى رەيتينگى بار 25 ورىن بار، ولار ءبىرىنشى توقساندا 173 مىڭ قوناق قابىلداعان.