ءوزىن «بانك قىزمەتكەرىمىن» دەگەن الاياق ورالدا تۇرعىنىنىڭ 1,4 ميلليون تەڭگەسىن يەمدەنىپ كەتكەن
ب ق و پوليتسيا دەپارتامەنتىنىڭ رەسمي وكىلى بولاتبەك بەلگىبەكوۆتىڭ ءمالىم ەتكەنىندەي، ەر ادام ءوزىن «كاسپي بانك» قاۋىپسىزدىك قىزمەتىنىڭ قىزمەتكەرى رەتىندە تانىستىرعان. ول 1958 -جىلعى ايەلگە «الاياقتار ءسىزدىڭ اتىڭىزعا نەسيە راسىمدەگەسى كەلىپ ءجۇر، وعان جول بەرمەس ءۇشىن ءوزىڭىز وسىلاي جاساڭىز» دەپ الداعان. وعان سەنگەن ايەل اۋەلى وزىنە، سوسىن قىزىنا نەسيە راسىمدەگەن. سودان كەيىن ەر ادام ايەلدە دەپوزيت بار- جوقتىعىن ءبىلىپ الىپ، قاۋىپسىز بولۋ ءۇشىن بارلىق اقشانى جەكە ەسەپكە اۋدارۋ قاجەتتىگىن ايتقان. وسىلايشا ايەل الاياققا بارلىعى 1 ميلليون 440 مىڭ تەڭگەسىن اۋدارىپ جىبەرگەن. سول سەكىلدى ورال قالاسىنىڭ 29 جاستاعى تۇرعىنى بەلگىسىز بىرەۋگە الدانىپ قالعان. الاياق Kaspi.kz قوسىمشاسى ارقىلى ونلاين نەسيە راسىمدەيمىن دەپ، 56,7 مىڭ تەڭگەسىن يەمدەنىپ كەتكەن. قازىرگى كەزدە اتالعان قىلمىستاردى اشۋ ءۇشىن جەدەل ىزدەستىرۋ شارالارى جۇرگىزىلۋدە. ەكى وقيعا بويىنشا ق ر ق ك 190-بابى 2-بولىگىنە (الاياقتىق) سايكەس قىلمىستىق ءىس قوزعالىپ، تەرگەۋ امالدارى جۇرگىزىلىپ جاتىر.