پەتروپاۆلدا ينتەرنەت- الاياقتار بويجەتكەننىڭ 1,3 ميلليون تەڭگەسىن جىمقىردى

None
None
پەتروپاۆل. قازاقپارات - پەتروپاۆلدا 25 جاستاعى بويجەتكەن ينتەرنەت- الاياقتارعا جەم بولىپ، دەپوزيت شوتىندا جاتقان 1 ميلليون 300 مىڭ تەڭگەسىنەن ايرىلدى، دەپ حابارلايدى قازاقپارات ءتىلشىسى.

سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، پەتروپاۆل تۇرعىنى OLX ارقىلى جاتىن بولمەگە ارنالعان جيحازدى ساتپاق بولادى. ونىڭ حابارلاندىرۋى بويىنشا ءبىر ايەل WhatsApp ارقىلى حابارلاسىپ، تولەم جاساۋ ءۇشىن كارتاسىنىڭ ءنومىرىن سۇراعان. ءبىرازدان كەيىن ول كارتاعا اقشا جىبەرىلمەي جاتقاندىعىن ايتىپ، باسقاسىن بەرۋدى سۇراعان. ايەل قۇربىسىنان كومەك سۇراپ، «ساتىپ الۋشى» اقشا اۋدارۋى ءۇشىن كارتوچكاسىنىڭ ءنومىرىن بەرۋدى وتىنەدى. 25 جاستاعى بويجەتكەن ونىڭ ءوتىنىشىن جەرگە تاستامايدى.

«ءبىرازدان سوڭ «ساتىپ الۋشى» جابىرلەنۋشىمەن بايلانىسقا شىعىپ، كارتانىڭ دەرەكتەمەلەرىن، تەگى، اتى، اكەسىنىڭ اتى، ج س ن سۇرايدى جانە ءبىراز ۋاقىتتان كەيىن ونىڭ تەلەفونىنا ءنومىر جازىلعان حابارلاما كەلەتىنىن جانە دە وعان وسى نومىرلەردى ايتۋدى سۇرايدى. كەيىن دەپوزيتتەن 1 ميلليون 300 مىڭ تەڭگە كولەمىندە قاراجات جوعالعانى انىقتالدى. ال جيحازدى ساتۋشىنىڭ كارتوچكاسىندا قاراجات بولماعان، سول سەبەپتى الاياقتار باسقاسىن بەرۋدى سۇراعان»، - دەيدى كريمينالدىق پوليتسيا باسقارماسىنىڭ باستىعى پەتر كليموۆ.

الاياق «جەكە تۇلعالارعا ارنالعان ينتەرنەت- بانكينگ» جانە «SMS- پارولدەردى جەتكىزۋ» قىزمەتتەرىن پايدالانىپ، جابىرلەنۋشىنىڭ بانك شوتىنان باسقا شوتتارعا اقشا اۋدارعان. اقشا جوعالعاننان كەيىن، قىز الدانعانىن ءتۇسىنىپ، پوليتسياعا جۇگىنگەن. جىل باسىنان س ق و- دا 375 ينتەرنەت- الاياقتىق فاكتىسى تىركەلدى. پوليتسەيلەر پروفيلاكتيكالىق جۇمىستاردى، ونىڭ ىشىندە كۇدىك تۋعىزاتىن حابارلاندىرۋلارعا مونيتورينگ جۇرگىزىپ تۇرادى. جىل باسىنان تانىمال ينتەرنەت- رەسۋرستاردا 100 دەن اسا حابارلاندىرۋ بۇعاتتالدى.

سوڭعى جاڭالىقتار