ماسەلەنى شەشپەسەك، مەكتەپتەردە ورىن تاپشىلىعى 1,2 ميلليونعا جەتەدى - مينيستر
«ەندى 2023-جىلدان باستاپ سالىناتىن مەكتەپتەر مەملەكەتتىك ستاندارتتارعا ساي بولۋى قاجەت. ەگەر روبوتوتەحنيكا، فيزيكا، حيميا پاندىك كابينەتتەرى قاجەت بولسا، وندا مەكتەپتى سوعان ساي جابدىقتاۋ كەرەك. قازىرگى ۋاقىتتا مەكتەپ سالىنىپ بىتەدى دە، ليتسەنزيا الۋعا كەلگەندە بارلىق قاجەتتى قۇرال-جابدىقتىڭ جەتىسپەيتىنى بەلگىلى بولاتىنى جاسىرىن ەمەس. ماسەلەن، سپورت زالىن الاتىن بولساق، قازىرگى ۋاقىتتا 1200 وقۋشىعا ارنالعان وتە ۇلكەن مەكتەپتەر سالىنىپ جاتىر. ەكى اۋىسىمدى ەسەپتەسەك، 2400 وقۋشى وقيدى. ءبىراق ول مەكتەپتە تەك ءبىر عانا سپورت زالى قاراستىرىلعان. ال ەگەر تيپتىك وقۋ باعدارلاماسىن قارايتىن بولساق، اپتاسىنا ءار سىنىپتا ءۇش ساعات دەنە شىنىقتىرۋ ساباعى بار. سول ءۇش ساعاتتى بارلىق سىنىپقا سانايتىن بولساق، وندا ءبىر سپورت زالى جەتىسپەيدى جانە ءبىر ۋاقىتتا بىرنەشە سىنىپ ءبىر سپورت زالىندا شىنىعادى. سوندىقتان بىرنەشە سپورت زالى كەرەك. نەلىكتەن قازىر كوپتەگەن اتا-انا بالالارىن مەملەكەتتىك-جەكەشەلىك ارىپتەستىك بويىنشا سالىنعان جاڭا مەكتەپتەرگە بەرۋگە ۇمتىلادى؟ سەبەبى ولار تولىق جابدىقتالعان جانە ستاندارتتارعا ساي. سوندىقتان بىزگە وسىنداي مەكتەپتەر قاجەت»، - دەدى اسحات ايماعامبەتوۆ.
مينيستر «قولايلى مەكتەپ» جوباسىندا قۇرىلىس ماتەريالدارىنىڭ ساپاسى جانە باستاۋىش پەن جوعارى سىنىپ وقۋشىلارىن بلوكتارعا ءبولۋ ماسەلەسى دە قاراستىرىلاتىنىن ايتتى.
«بۇل جوبا بويىنشا بىزدە قوسىمشا 800 مىڭنان استام ورىن بەرىلەدى جانە جوعارىدا ايتىلعان ماسەلەلەر شەشىمىن تابادى. بۇگىنگى تاڭدا ەلىمىز بويىنشا مەكتەپتەردە 250 مىڭنان استام ورىن تاپشىلىعى بار. ەگەر ءبىز وسى ماسەلەنى قازىر شەشپەسەك، 2026-جىلعا قاراي جالپى تاپشىلىق 1 ميلليون 200 مىڭعا دەيىن جەتەدى. بىلتىر ءبىز پرەزيدەنتتىڭ تاپسىرماسى اياسىندا 277 مەكتەپ سالدىق. بيىل 225 تەن اسا مەكتەپ سالعالى وتىرمىز. مەكتەپ قۇرىلىسى مەن قارجىلاندىرۋدى اكىمدىكتەر جۇرگىزەدى»، - دەدى مينيستر.