بيىل 1,2 ميلليون قازاقستاندىق تۇرعىلىقتى جەرىنە ونلاين تىركەلگەن
بۇل رەتتە 699 مىڭ قىزمەت الۋشى ح ق و- عا بارىپ تىركەلۋدى ءجون كورگەن، دەپ حابارلايدى قازاقپارات.
وسىلايشا، 2020 -جىلى egov.kz پورتالىنداعى «قازاقستان رەسپۋبليكاسى ازاماتتارىن تۇرعىلىقتى جەر بويىنشا تىركەۋ» قىزمەتىنە سۇرانىس ەكى ەسەگە جۋىق وسكەنى بايقالادى. وتكەن جىلدىڭ سايكەس مەرزىمى ىشىندە كورسەتكىش تۇبەگەيلى باسقا بولعان. ح ق و ارقىلى 2,1 ميلليوننان استام قىزمەت الىنسا، 726 مىڭ تىركەۋ ەلەكتروندىق ۇكىمەت پورتالىندا جۇزەگە اسقان.
«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما ءتورايىمى اسەمگۇل بالتاشيەۆانىڭ ايتۋىنشا، ەلەكتروندى قىزمەتتەرگە دەگەن سۇرانىستىڭ كۇرت ءوسۋى COVID-19 پاندەمياسى مەن توتەنشە جاعداي كەزىندە حالىققا قىزمەت كورسەتۋ ورتالىقتارىنىڭ جابىلۋىنا بايلانىستى.
«پاندەميا ەلەكتروندى قىزمەتتەردىڭ دامۋىنا ۇلكەن سەرپىن بەردى. ەگەر بۇرىن ۇلكەنى دە، كىشىسى دە قاراپايىم انىقتامالار ءۇشىن حالىققا قىزمەت كورسەتۋ ورتالىعىنا بارۋدى ءجون كورەتىن بولسا، كارانتين جاعدايىندا دەنساۋلىقتارىنا الاڭداعان ازاماتتار مەملەكەتتىك قىزمەتتەردى ءوز بەتىنشە ونلاين تۇردە الا باستادى. كۇن سايىن مىڭداعان ادام قىزمەت الۋعا كەلەتىن مەملەكەتتىك قىزمەتتەردىڭ ءبىرىڭعاي پروۆايدەرى رەتىندە بۇل ءبىزدى وتە قۋانتىپ وتىر. ازاماتتارعا بۇدان دا كۇردەلى قىزمەتتەردى ۇسىنۋ مۇمكىندىگى جاسالۋدا»، - دەدى بالتاشيەۆا.
Egov.kz ەلەكتروندى ۇكىمەت پورتالىندا تۇرعىلىقتى جەرى بويىنشا تىركەلۋ ءۇشىن ءوتىنىش بەرۋشىنىڭ جانە جىلجىمايتىن مۇلىك يەسىنىڭ ەلەكتروندىق تسيفرلىق قولتاڭباسى بولۋى كەرەك. تىركەلۋشى ازامات ءوتىنىش جاساپ، مۇلىك يەسى ونى راستاۋى قاجەت. تۇرعىنداردى تىركەۋ قىزمەتىن «ازاماتتىق، ميگراتسيا جانە يمميگراتسيا» - «حالىقتى تىركەۋ جانە تىركەۋ ەسەبىنەن شىعارۋ» بولىمىنەن تابۋعا بولادى.
ەسكە سالايىق، 2019 -جىلدىڭ ماۋسىم ايىنان باستاپ ازاماتتاردى تۇرعىلىقتى جەرى بويىنشا تىركەۋ قىزمەتىن «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ قىزمەتكەرلەرى جۇزەگە اسىرا باستادى. بۇل حالىققا قىزمەت كورسەتۋ ورتالىقتارىنىڭ جۇمىس كەستەسىنە سايكەس تىركەۋ قىزمەتتەرىن ۇسىنۋعا مۇمكىندىك بەردى، ياعني تاڭعى 9.00-دەن كەشكى 20.00-گە دەيىن تۇسكى ءۇزىلىسسىز، سونداي- اق كوشى- قون پوليتسياسىنىڭ دەرەكتەر بازاسىنا تىركەۋ مۇمكىندىگى بار قىزمەتكەرلەردىڭ سانىن كوبەيتىپ، وسى قىزمەت تۇرىنە كەزەكتى ازايتتى.