كوروناۆيرۋس جۇقتىرۋ جاعدايىنىڭ تاۋلىكتىك ءوسىمى 1,2 پايىزدان اسپايدى - اسقار مامين

نۇر-سۇلتان. قازاقپارات - ەلىمىزدە كوروناۆيرۋستىق ينفەكتسيا تىركەلگەن جاعدايلاردىڭ تاۋلىكتىك ءوسىم دەڭگەيى 1,2 پايىزدان اسپايدى.

بۇل تۋرالى ۇكىمەت وتىرىسىندا ق ر پرەمەر-ءمينيسترى اسقار مامين ايتتى، دەپ حابارلايدى قازاقپارات ءتىلشىسى.

«جالپى ەلدەگى سانيتارلىق-ەپيدەميولوگيالىق جاعداي جاقسارىپ كەلە جاتقانىن كورىپ وتىرمىز. كوروناۆيرۋستىق ينفەكتسيا تىركەلگەن جاعدايلاردىڭ تاۋلىكتىك ءوسىم دەڭگەيى 1,2 پايىزدان اسپايدى. قازىرگى ۋاقىتتا ەمدەلىپ شىققان ادامدار بارلىق اۋرۋ جۇقتىرعان ادامداردىڭ 69,4 پايىزىن قۇرايدى. قالعان ناۋقاستار قاجەتتى مەديتسينالىق كومەك الۋدا. اۋرۋحانالاردىڭ جۇكتەمەسى 36 پايىزعا دەيىن تومەندەدى. دەنساۋلىق ساقتاۋ مينيسترلىگىنىڭ دەرەكتەرى بويىنشا اپتا قورىتىندىسىندا ينفەكتسيانىڭ رەپرودۋكتيۆتىك دەڭگەيى 1 دەن تومەن كەلەسى وبلىستاردى اتاپ وتۋگە بولادى. ولار - اتىراۋ، اقتوبە، ماڭعىستاۋ، قىزىلوردا، شىعىس قازاقستان، جامبىل، تۇركىستان، پاۆلودار وبلىستارى جانە نۇر-سۇلتان، شىمكەنت، الماتى قالالارى»، - دەدى پرەمەر-مينيستر.

سونىمەن قاتار ۇكىمەت باسشىسى ينفەكتسيانىڭ رەپرودۋكتيۆتىك دەڭدەيى قوستاناي مەن اقمولا وبلىستارىندا 1 دەن جوعارى تىركەلگەنىن اتاپ ءوتتى.

«بۇل وڭىرلەردىڭ اكىمدەرى ەپيدەمياعا قارسى شارالاردى كۇشەيتۋگە اسا نازار اۋدارۋى قاجەت. اۋرۋ جۇقتىرعان ازاماتتاردى ەمدەۋ جانە ۆيرۋستىڭ تارالۋىن تومەندەتۋ جونىندەگى قارقىندى جۇمىستى، ونىڭ ىشىندە سانيتارلىق نورمالاردى، ماسكا كيۋ رەجيمىن ساقتاۋ تۋرالى ءتۇسىندىرۋ ناۋقانىن جالعاستىرۋ كەرەك»، - دەدى اسقار مامين.

ۇكىمەت باسشىسىنىڭ ايتۋىنشا، قازىرگى تاڭدا الەمدىك ستاتيستيتكا 126 مەملەكەتتە اۋرۋ جۇقتىرعاندار سانىنىڭ جاڭا ءوسىمىن كورسەتىپ وتىر.

«ىندەتتىڭ جاڭا تولقىنى كۇزدە پايدا بولۋى مۇمكىن جانە وعان دايىن بولۋمىز كەرەك. ونىڭ الدىن الۋ ءۇشىن بارلىق بەلگىلەنگەن تالاپتاردىڭ ساقتالۋىن قامتاماسىز ەتىپ، جوسپارلانعان شارالاردىڭ كەشەنىن ىسكە اسىرۋ قاجەت»، - دەدى ول.