قازاقستاندا 1,2 ميلليون كاسىپكەر سالىقتان بوساتىلادى - قارجى مينيسترلىگى

نۇر- سۇلتان. قازاقپارات - بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ق ر قارجى مينيسترلىگى مەملەكەتتىك كىرىستەر كوميتەتى ءتوراعاسىنىڭ مىندەتىن اتقارۋشى جانىبەك نۇرجانوۆ بيزنەس سۋبەكتىلەرىنىڭ %75 سالىقتان بوساتىلاتىنىن ايتتى، دەپ حابارلايدى قازاقپارات ءتىلشىسى.

«ءبىزدىڭ دەرەكتەر بويىنشا، بارلىعى 1,2 ميلليون كاسىپكەرلىك سۋبەكتى سالىقتان بوساتۋعا جاتادى. بۇل بيزنەس سۋبەكتىلەردىڭ بارلىق سانىنىڭ %75. مەملەكەتتىك كىرىستەر ورگاندارى تەكسەرۋلەردىڭ سانىن تومەندەتۋ بويىنشا جوسپارلى تۇردە جۇمىس اتقارۋدا. 2019 -جىلى مەملەكەتتىك كىرىستەر ورگاندارى 27187 سالىقتىق تەكسەرىس وتكىزدى. بۇل، وتكەن جىلدىڭ وسى مەرزىمىمەن سالىستىرعاندا %28,7 تومەن» ، - دەيدى جانىبەك نۇرجانوۆ.

سونىمەن قاتار، ونىڭ ايتۋىنشا، تاۋەكەلدەردى باسقارۋ جۇيەسىن ىرىكتەۋ ولشەمدەرىن جەتىلدىرۋ جانە مەملەكەتتىك كىرىستەر ورگاندارىنىڭ وكىمىندە بار دەرەكتەردى تالداۋ ارقىلى زاڭ بۇزۋشىلىقتاردى انىقتاۋ بويىنشا جۇمىستار كۇشەيتىلۋدە.

بۇعان دەيىن ج. نۇرجانوۆ ارناۋلى سالىق رەجيمدەرىن قولداناتىن، سونداي- اق ميكرو جانە شاعىن كاسىپكەرلىك سۋبەكتىسى بولىپ تابىلاتىن تۇلعالار بيىلعى 1 - قاڭتاردان باستاپ، 2022 -جىلدىڭ 31 - جەلتوقسانىنا دەيىن تابىس سالىعىنان بوساتۋ ەرەجەلەرىن قولدانۋعا قۇقىلى ەكەنىن ءمالىم ەتكەن بولاتىن.