اۋليەاتا وڭىرىندە حالىق سانى 1 ميلليون 100 مىڭنان استى
ستاتيستيكا دەپارتامەنتىنىڭ باسشىسى سىرىم ماديەۆتىڭ ايتۋىنشا، حالىق ساناعىنىڭ دايىندىق كەزەڭى 1-30 ماۋسىم ارالىعىندا وتكەن. ينتەرۆيۋەرلەر مەكەنجايلاردى، سونداي-اق وندا تۇراتىن حالىقتىڭ ناقتى سانىن انىقتاۋ ءۇشىن ءاربىر ەلدى مەكەندى ارالاعان.
الدىن الا مالىمەت بويىنشا، وبلىس حالقىنىڭ سانى 1120293 ادامدى قۇراعان. 1-قىركۇيەك پەن 15-قازان ارالىعىندا تۇرعىندار ساناققا قاتىستى بارلىق سۇراقتارعا sanaq.gov.kz مامانداندىرىلعان ۆەب-سايتى ارقىلى ونلاين رەجيمدە جاۋاپ بەرە الادى.
ءداستۇرلى جاپپاي ارالاۋ 1-30-قازان ارالىعىنا جوسپارلانعان جانە ونلاين-رەجيمدە ساناقتان وتپەگەن رەسپوندەنتتەر اراسىندا جۇرمەك.
«ءبىرىنشى كەزەڭ بارىسىندا ءبىرقاتار وزەكتى ماسەلەلەر انىقتالدى. جۋالى، قورداي، ت. رىسقۇلوۆ اۋداندارىنىڭ كەيبىر ەلدى مەكەندەرىندە ۇيالى بايلانىس ساپاسىن جاقسارتۋ بويىنشا شۇعىل شارالار قابىلداۋ قاجەت»، - دەدى س. ماديەۆ. ول تاراز قالاسى جانە اۋدان اكىمدىكتەرى وبلىستىق پوليتسيا دەپارتامەنتىمەن بىرلەسىپ، ينتەرۆيۋەرلەردىڭ قاۋىپسىزدىگىن قامتاماسىز ەتۋ قاجەتتىگىن اتاپ ءوتتى.
«سارىسۋ، تالاس، ت. رىسقۇلوۆ اۋداندارىندا كەيبىر ەلدى مەكەندەردىڭ اتاۋلارى اكىمشىلىك- اۋماقتىق وبەكتىلەر جىكتەۋىشى مەن مەكەنجاي تىركەلىمى بويىنشا سايكەس كەلمەيدى»، - دەپ اتاپ ءوتتى س. ماديەۆ.
ايماق باسشىسى اتالعان ءۇش اۋدان اكىمدەرىنە وسى ماسەلەنى شەشۋدى تاپسىردى.
«بارلىق ەلدى مەكەندەردىڭ تىزبەسىن وزەكتەندىرۋ قاجەت، ونىڭ ىشىندە قالانىڭ ساياجاي القاپتارىنا، شالعاي اۋىلدارعا جانە شەكارا ماڭىندا ورنالاسقان اۋىلدارعا ايرىقشا نازار اۋدارعان ءجون. الداعى حالىق ساناعىنىڭ الەۋمەتتىك- ەكونوميكالىق ماڭىزى زور. حالىق ساناعى بارىسىندا الىنعان دەرەكتەر ءاربىر تۇرعىندى مەملەكەتتىك قولداۋمەن قامتۋعا مۇمكىندىك بەرەدى»، - دەدى وبلىس اكىمى. سونداي-اق، بەردىبەك ساپاربايەۆ اقپاراتتىق-ءتۇسىندىرۋ جۇمىسىن كۇشەيتۋدى جانە حالىق ساناعى تۋرالى تولىق اقپاراتتى الەۋمەتتىك جەلىلەر مەن ب ا ق-تا جۇيەلى تۇردە جاريالاپ وتىرۋدى تاپسىردى.
اۆتور: سايا سەمباي