ەلباسى 1 - قاڭتاردان ەڭ تومەنگى جالاقىنى 1,5 ەسە كوتەرۋدى تاپسىردى

None
None
استانا. قازاقپارات - ۇكىمەت 2019 -جىلدىڭ 1 - قاڭتارىنان ەڭ تومەنگى جالاقىنى 1,5 ەسە وسىرەتىن بولادى. بۇل تۋرالى بۇگىن اقوردادا قازاقستان حالقىنا كەزەكتى جولداۋىن جاريالاعان ەلباسى نۇرسۇلتان نازاربايەۆ ايتتى، دەپ حابارلادى قازاقپارات ءتىلشىسى.

«ۇكىمەتكە 2019 -جىلدىڭ 1 - قاڭتارىنان باستاپ ەڭ تومەنگى جالاقىنى 1,5 ەسە، 28 مىڭنان 42 مىڭ تەڭگەگە دەيىن ءوسىرۋدى تاپسىرامىن. بۇل ءاربىر قازاقستاندىق ءۇشىن شىنايى كومەك بولادى. بۇل بارلىق سالالاردا، بارلىق مەنشىك فورماسىنداعى كاسىپورىنداردا جۇمىس ىستەيتىن 1 ميلليون 300 مىڭ ادامنىڭ ەڭبەكاقىسىن كوتەرۋگە سەپتىگىن تيگىزەدى»، - دەدى ەلباسى.

 ق ر پرەزيدەنتىنىڭ ايتۋىنشا، سونىمەن قاتار جالاقى ءوسىمى بيۋدجەتتىك ۇيىمداردىڭ 275 مىڭ قىزمەتكەرىنە دە قاتىستى. ياعني، مۇعالىمدەردىڭ، دارىگەرلەردىڭ، قۇقىق قورعاۋ، قورعانىس ورگاندارىنىڭ قىزمەتكەرلەرىنىڭ جالاقىسى 35 پايىزعا ارتادى.

 «بۇل ماقساتتارعا 2019-2021 -جىلدارعا رەسپۋبليكالىق بيۋدجەتتەن جىل سايىن 906 ميلليارد تەڭگە ءبولۋ قاجەت. بيۋدجەتتى قاراۋ بارىسىندا پارلامەنت مۇنى ەسكەرەدى دەپ ويلايمىن»، - دەدى نۇرسۇلتان نازاربايەۆ.

بۇل رەتتە ەڭ تومەنگى جالاقى ەڭ تومەنگى كۇنكورىس دەڭگەيىنە بايلانىستى بولمايتىندىعىن باسا ايتتى.

«ەڭ تومەنگى جالاقىنىڭ جاڭا كولەمى تولىقتاي العاندا بۇكىل ەل ەكونوميكاسىندا ەڭبەكاقى ءوسىمىنىڭ كاتاليزاتورى بولادى دەپ ويلايمىن. بۇل باستاما ءبىزدىڭ بارلىق وتاندىق جانە شەتەلدىك ءىرى كومپانيالار تاراپىنان قولداۋ تابادى دەپ سەنەمىن»، - دەدى ەلباسى.

 

 

مەملەكەت باسشىسى نۇرسۇلتان نازاربايەۆ حالىققا ارناعان جىل سايىنعى جولداۋىندا مەديتسينا قىزمەتكەرلەرىنىڭ جالاقىسىن كوتەرۋدى تاپسىردى.

«2019 -جىلعى 1 - قاڭتاردان باستاپ ۋچاسكەلىك مەديتسينا قىزمەتكەرلەرىنىڭ جالاقىسىن 20 پروتسەنتكە كوتەرۋدى تاپسىرامىن. وسى ماقساتتا كەلەسى جىلى بيۋدجەتتەن 5 ميلليارد تەڭگە بولىنەدى» ، - دەدى ن. نازاربايەۆ.

ايتا كەتەيىك، ۋچاسكەلىك مەديتسينا قىزمەتكەرلەرىنىڭ جالاقىسى بىرتىندەپ كوتەرىلەتىن بولادى. ءاربىر ماماننىڭ جاڭا ءادىس- تاسىلدەردى ەنگىزۋ قابىلەتىنە باسا نازار اۋدارىلماق.

سونداي- اق پرەزيدەنت جەرگىلىكتى جەردەگى مەديتسينالىق- سانيتارلىق كومەكتى كۇشەيتۋ قاجەتتىگىن اتاپ ءوتتى.

بۇدان بولەك، ەلباسى بيىلعى جولداۋىندا 2019 -جىلى «پەداگوگتاردىڭ مارتەبەسى» تۋرالى زاڭ قابىلداناتىنىن ايتتى.


اۆتور: مارلان جيەمباي

 

 

سوڭعى جاڭالىقتار