باستاپقى جارنا 0 پايىز: جەڭىلدەتىلگەن العاشقى اگروتەحنيكا بەرىلدى

قوستاناي. قازاقپارات - جەڭىلدەتىلگەن ليزينگ باعدارلاماسىمەن العاشقى اۋىل شارۋاشىلىعى تەحنيكاسىن قوستاناي وبلىسىنىڭ فەرمەرلەرى الدى، دەپ حابارلايدى قازاقپارات.

قازاقستاندا جاسالعان اۋىل شارۋاشىلىعى تەحنيكاسىن جەڭىلدىكپەن ليزينگكە بەرۋ باعدارلاماسىنا ءوتىنىم قابىلداۋ بيىلعى 5- تامىزدا باستالعان بولاتىن.

باعدارلامانى ىسكە اسىرۋ ءۇشىن شامامەن 1 مىڭ دانا تراكتور، كومباين جانە وزگە دە تەحنيكانى ساتىپ الۋعا 40 ميلليارد تەڭگە ءبولىندى.

باعدارلامانىڭ شارتتارى:

• ليزينگ مەرزىمى - 10 جىلعا دەيىن؛

• سىياقى مولشەرلەمەسى - جىلدىق 6 پايىز؛

• ليزينگ بويىنشا باستاپقى جارنا - 0 پايىز؛

• نەگىزگى قارىزدى قايتارۋ بويىنشا جەڭىلدىكتى كەزەڭ - 1 جىل.

باعدارلامانىڭ ءتيىمدى شارتتارى وتاندىق تەحنيكاعا ۇلكەن سۇرانىس تۋدىردى. بۇگىنگى تاڭدا 15,4 ميلليارد سوماسىنا اۋىل شارۋاشىلىعى تاۋار وندىرۋشىلەرىنەن 202 ءوتىنىم ءتۇستى.

«بۇل وتە جاقسى باعدارلاما، شارتتارى ىڭعايلى، باستاپقى تولەمسىز بەرۋ فەرمەرلەر ءۇشىن ۇلكەن كومەك. وسى باعدارلامانىڭ ارقاسىندا سيپاتتاماسى جاعىنان جاقسى «كيروۆەتس» جاڭا تراكتورىن ساتىپ الۋ مۇمكىندىگىنە يە بولدىق»، - دەدى «مايباسوۆ ز. م» شارۋا قوجالىعىنىڭ وكىلى.