جالپى ىشكى ءونىم 0,7 پايىزعا ءوستى - اسەت ەرعاليەۆ

نۇر- سۇلتان. قازاقپارات - 2021 -جىلعى قاڭتار- ءساۋىر قورىتىندىسىندا جالپى ىشكى ءونىم ءوسۋ قارقىنى 0,7 پايىزدى قۇرادى. بۇل تۋرالى بۇگىن ۇكىمەت وتىرىسىندا ق ر ۇلتتىق ەكونوميكا ءمينيسترى اسەت ەرعالييەۆ ايتتى، دەپ حابارلايدى قازاقپارات ءتىلشىسى.

«2021 -جىلعى قاڭتار- ءساۋىر قورىتىندىلارى بويىنشا جالپى ىشكى ءونىم ءوسۋ قارقىنى وتكەن جىلعى ناۋرىز ايىنان بەرى العاش رەت 0,7 پايىزدى قۇرادى. قازاقستان ەكونوميكاسى ءوسۋدىڭ قالپىنا كەلۋ سەرپىنىنە وتۋدە. قىزمەت كورسەتۋ سالاسىنىڭ ءوسۋى جاقساردى. ىشكى سۇرانىس جاقسارۋدا. وڭدەۋ ونەركاسىپ سالالارىندا سەرپىندى جانە تۇراقتى ءوسۋ بايقالادى. قىزمەت كورسەتۋ سالاسى وڭ ءوسىمدى كورسەتىپ وتىر. سونىمەن بىرگە ەكونوميكانىڭ ءوندىرۋشى ەمەس سالالارىندا نەگىزگى كاپيتالعا ينۆەستيتسيالاردىڭ ايتارلىقتاي وسۋدە. جالپى العاندا، ەكونوميكا ءوسىمىنىڭ قۇرىلىمدا ساپالى وزگەرىستەر بايقالۋدا»، - دەدى مينيستر.

ونىڭ اتاپ وتۋىنشە، ەكونوميكا دامۋىنىڭ باستى درايۆەرى وتكەن جىلدان بەرى ناقتى سەكتوردىڭ تۇراقتى ءوسۋى بولىپ سانالادى. وسى جىلدىڭ ەسەپتى كەزەڭىندە كەن ءوندىرۋ ونەركاسىبىن ەسەپكە الماعاندا، ناقتى سەكتورداعى ءوسۋ 7,9 پايىزدى قۇرادى. قۇرىلىس، اقپارات پەن بايلانىس، وڭدەۋ ونەركاسىبى، سۋمەن جانە ەلەكترمەن جابدىقتاۋ، اۋىل شارۋاشىلىعى سالالارىندا جوعارعى ءوسۋ جالعاسۋدا. بۇل رەتتە، وڭدەۋ ونەركاسىبى سوڭعى 10 جىلداعى ەڭ جوعارى ءوسۋدى كورسەتكەن.

«قىزمەت كورسەتۋ سالاسى قالپىنا كەلۋدە. ساۋدانىڭ 5,7 پايىزعا ءوسۋى اياسىندا قىزمەت كورسەتۋ سەكتورى وڭ ءوسۋدى كورسەتتى. وڭدەۋ ونەركاسىبى سالالارىندا قارقىندى جانە تۇراقتى ءوسۋ بايقالۋدا. بۇل وسى سالانىڭ باسەكەلەستىككە قابىلەتتىلىگىن كورسەتەدى. اتاپ ايتقاندا ءوسىم ماشينا جاساۋدا 20,6، ونىڭ ىشىندە اۆتوموبيل قۇراستىرۋدا - 25,4، قۇرىلىس ماتەريالدارىندا - 26,5، حيميالىق ونىمدەر وندىرىسىندە - 11,2، پلاستماسسا ونىمدەرى وندىرىسىندە - 18,5، فارماتسيەۆتيكادا - 26,2، كيىم وندىرىسىندە - 23,6 جانە جيھاز وندىرىسىندە - 19,5 پايىز دەڭگەيىندە تىركەلدى»، - دەدى اسەت ەرعاليەۆ.

ونىڭ ايتۋىشا، ءوندىرۋشى ەمەس سالالاردا جوعارى ينۆەستيتسيالىق بەلسەندىلىك بايقالادى. بۇل ەكونوميكانىڭ تۇراقتى جانە ساپالى دامۋىنا ءارتاراپتاندىرۋ ارقىلى قول جەتكىزۋگە مۇمكىندىك بەرەدى. ءمينيستردىڭ دەرەگىنشە، كەن ءوندىرۋ ونەركاسىبىن ەسەپكە الماعاندا، نەگىزگى كاپيتالعا ينۆەستيتسيالاردىڭ ءوسۋى 32,3 پايىزدى قۇرادى.

«ينۆەستيتسيالاردىڭ ايتارلىقتاي ءوسۋىن وڭدەۋ ونەركاسىبى - 2,1 ەسە، قۇرىلىس – 72، اۋىل شارۋاشىلىعى – 66، اقپارات جانە بايلانىس – 61، ساۋدا - 28,3، كولىك - 27,6 جانە جىلجىمايتىن مۇلىكپەن وپەراتسيالار 27,5 پايىز دەڭگەيىندە كورسەتتى»، - دەدى اسەت ەرعاليەۆ.