كوروناۆيرۋسقا قارسى ۆاكتسينا جاساۋ ءۇشىن 0,5 ميلليون اكۋلا ءولتىرىلۋى مۇمكىن
ا ق ش- تىڭ جابايى تابيعات جونىندەگى ساراپشىلارىنىڭ ايتۋىنشا، اكۋلانىڭ باۋىرىندا كوروناۆيرۋس ۆاكتسيناسىنىڭ وندىرىسىندە قولدانىلاتىن ەلەمەنتتەردىڭ ءبىرى بار. ول «سكۆالەن» دەپ اتالادى.
ءمالىم ەتىلگەندەي، بريتانيا كومپانيالارىنىڭ ءبىرى سكۆالەندى تۇماۋعا قارسى ۆاكتسينا جاساۋ ءۇشىن قولدانادى. مامىر ايىندا كوروناۆيرۋسقا قارسى ۆاكتسينالاردا قولدانىلۋى ىقتيمال اديۋۆانتتىڭ ميلليارد دوزاسى شىعارىلاتىنى جوسپارلانۋدا. ءبىر توننا سكۆالەنگە شامامەن 3 مىڭ اكۋلا قاجەت بولادى.
كاليفورنيادا ورنالاسقان «Shark Allies» توبىنىڭ اقپاراتىنشا، قۇرامىندا اكۋلانىڭ باۋىر مايى بار ءبىر دوزانى ءار ادامعا بەرۋ ءۇشىن شامامەن 250 مىڭ اكۋلانى ءولتىرۋ قاجەت بولادى. ءبىراق دوزانىڭ مولشەرىنە بايلانىستى ولاردىڭ سانى كوپ بولۋى مۇمكىن. ەگەر زەرتتەۋشىلەر بولجاعانداي ادامداردى يممۋنداۋ ءۇشىن ەكى دوزا قاجەت بولسا. ءولتىرىلۋى ءتيىس اكۋلالاردىڭ سانى جارتى ميلليونعا دەيىن ارتۋى مۇمكىن. مۇندايدى بولدىرماۋ ءۇشىن عالىمدار سكۆالەندى قانت قامىسىنان جاسالعان سينتەتيكالىق زاتپەن اۋىستىرۋدى سىناقتان وتكىزۋدە.