ҚАЗ
РУС
QAZ
ENG
中文 قازاقشا
19.11.2017 XX:XX:XX>
06.09.2017   09:38
بىزگە قازاقستاننان ەۋروپاعا بارعان باۋىرلارىمىزبەن ءتىل تابىسۋ قيىنداۋ - شۆەتسيا قازاعى ماحمۇت سارباس

استانا. قازاقپارات - شۆەتسيا ەلىندەگى قازاق مادەنيەت ورتالىعىن 18 جىلداي باسقارعان قانداسىمىز ماحمۇت سارباستىڭ استاناعا كەلگەن ساپارىندا سۇحباتتاسۋدىڭ ءساتى ءتۇستى.

ول الەمنىڭ 100 ەلىندە 150 مىڭعا جۋىق فيليالى بار، ەلەكتروتەحنيكا، ەنەرگەتيكا جانە اقپاراتتىق تەحنولوگيالار سالاسىنا ماماندانعان شۆەدتىك ايگىلى ABB كومپانياسىندا 30 جىل ينجەنەر بولىپ قىزمەت اتقارعان.

- ماحمۇت سارباس مىرزا، قازاق ەلىنە قوش كەلدىڭىز! بۇل قازاقستانعا نەشىنشى رەت كەلۋىڭىز؟

- راحمەت! مەن قازاقستانعا جىل قۇرعاتپاي كەلىپ تۇرامىن. بيىلعى ساپارىم EXPO- نىڭ قاسيەتتى قازاق جەرىندە، ەلورداسى استانا تورىندە وتۋىنە بايلانىستى دەسەم بولادى.

- ەندەشە، الدىمەن ءوز ءومىر تاريحىڭىز تۋرالى قىسقاشا ايتىپ بەرسەڭىز...

- تۋعان جەرىم - قازاقتار قازىرگە دەيىن مەكەن ەتەتىن تۇركيانىڭ التاي دەگەن اۋىلى. اكە- شەشەم سول ەلدەگى باسقا قازاقتار سەكىلدى قىتايدىڭ قۇمىل ايماعىنا قاراستى باركول، اتورىك ءوڭىرى جاقتان ەل باسىنا كۇن تۋىپ، ەل اۋعان زاماندا جۇرتپەن بىرگە اتاقتى گيمالاي تاۋلارىنان اسىپ، 17 جىلداي پاكىستان مەملەكەتىن مەكەندەپ، تۇركياعا جەتكەن قازاقتاردىڭ ءبىرى. وسى ەلگە بارعان سوڭ قۇجات بەرەر كەزدە تەگىڭدى جاز دەگەندە اكەم يمانعالي ءوز تەگى رەتىندە، كەرەي ىشىندە سارباس رۋىنان بولعاسىن يمانعالي سارباس دەپ جازدىرعان. اكەم ەتىنىڭ تىرىلىگى ارقاسىندا پاكىستانداعى قيىن كۇندەر كەشىپ جۇرگەندە-اق مەككەگە بارىپ قايتقان ادام، ول جاعىن تۇركياداعى زامانداستارىنىڭ ءبارى بىلەدى. مەن ومىرگە كەلگەندە اكەم انكارادان 350 شاقىرىم قاشىقتىقتاعى التاي اۋىلىندا مال شارۋاشىلىعىمەن جانە دۇكەن اشىپ، ساۋدا جاساۋمەن اينالىسقان ەكەن. ول كىسى مەنىڭ ەكى جارىم جاسىمدا قايتىس بولىپ، جالعىز شەشەمنىڭ قاراۋىندا قالىپپىن. ءبىراق شەشەم دە كوپ ۇزاماي، 7 جاسىمدا و دۇنيەلىك بولىپ كەتتى. سودان اكەم ولگەن سوڭ شەشەمدى وزىنە قاراتىپ العان ءبىر تۋىسقان اعامىزدىڭ قاراۋىندا قالدىم. ءوزىم ءبىر اتادان جالعىزبىن.

ول ۋاقىتتا تۇركيادا ەلدىڭ كوبى 5 سىنىپتى قاناعات تۇتىپ، وقۋعا، بىلىمگە اسا ىنتىقپايتىن كەز ەدى. سول بەس جىلدىقتى بىتىرگەن سوڭ اۋىلدا مال باعۋعا كومەكتەسىپ، ءومىر ءسۇرىپ جۇرگەن ەدىم. شەشەم تۇسكەن شاڭىراقتىڭ ءبىر ۇلى شۆەتسيا ەلىنە بارىپ قارا جۇمىس ىستەپ جۇرەتىن. ول ءبىر جولى اۋىلعا كەلىپ، مەنىڭ جاعدايىمدى كورىپ، بۇلاي جۇرە بەرسەڭ، بولاشاعىڭ قيىن بولادى دەپ ىستانبۇلداعى اعايىنداردىڭ ۇيىنە اپارىپ تاستادى. ءبىراق ول جاقتاعى جاعدايىم تاعى دا ءماز بولماعان سوڭ، كەلەسى جىلى ماعان حابارلاسىپ، شۆەتسيا ەلىنە شاقىردى. ءسويتىپ، بار جوعى 15 جاسىمدا جۇمىس ىزدەپ، وسى كەزگە دەيىن مەكەن ەتىپ كەلە جاتقان ەلىمدەگى ۆەستەروس قالاسىنا باردىم. ول ەلدە كامەلەت جاسىنا تولماعان بالانىڭ جۇمىس ىستەۋىنە تىيىم سالىنعاندىقتان، شۆەد ەلى مەنى مەكتەپكە قابىلدادى. ءبىراق شۆەتسياعا جۇمىس ىزدەپ كەلگەنىممەن بۇل ەلدىڭ تىلىندە ءبىر اۋىز ءسوز بىلمەۋشى ەدىم. سوندىقتان مەكتەپ مۇعالىمدەرى ماعان كۇن سايىنعى ساباقپەن بىرگە 3-4 ساعات شۆەد ءتىلىن ۇيرەتتى. ساباق وقۋعا، ءتىل ۇيرەنۋگە بەيىمىم وتە جاقسى بولعاندىقتان 4-5 ايدىڭ كولەمىندە بۇل تىلدە ەركىن سويلەپ، ساباقتا دا ۇزدىك وقۋشىلاردىڭ قاتارىنا قوسىلىپ كەتتىم. مەكتەپ ديرەكتورىنىڭ نازارىنا ىلىكتىم. ديرەكتور مەنى كابينەتىنە ارنايى شاقىرىپ الىپ، قانداي ماماندىق تاڭداسام دۇرىس بولاتىنى تۋراسىندا كەڭەسىن بەردى. مەن سول مەكتەپ ديرەكتورىنىڭ نۇسقاۋى بويىنشا قازىرگى ءوز ماماندىعىمدى تاڭدادىم.

ءسويتىپ ج و و- نى بىتىرگەننەن كەيىن اتومدىق ەنەرگەتيكا جانە گيدروەنەرگيا ءوندىرۋ ABB كومپانياسىندا ينجەنەر بولىپ ۇزاق جىل قىزمەت ەتتىم.

- التايدان اۋا كوشكەن قازاقتار تۇركياعا بارىپ، سول ەلدى پانا تۇتىپ ءبىرجولا تۇراقتاپ قالدى دەپ ايتۋعا بولادى. دەگەنمەن سول بارعان قانداستارىمىزدىڭ اراسىندا ءارى قاراي ەۋروپا اسىپ كەتكەندەرى دە از ەمەس. وسىنىڭ سەبەبى نەدە؟ الدە ەۋروپادا ءومىر ءسۇرۋ تۇركيامەن سالىستىرعاندا وڭايىراق پا؟

- ءيا، ونىڭ ءارتۇرلى سەبەپتەرى بار. قازاقتار نەگىزىنەن تۇركيادان ەۋروپا ەلدەرىنە سوندا تۇراقتاپ قالۋ ءۇشىن بارمايدى. ولاردىڭ كوبى تۇركياداعى تۇرمىسىن جاقسارتىپ الۋدىڭ قامىمەن كەتەدى. ءبىراق بارعانداردىڭ ەشقايسىسى قايتىپ كەلمەيدى. سول جۇمىس ىستەگەن ەلىندە تۇراقتاپ قالىپ جاتادى. ەۋروپادا تۇراتىن قازاقتاردىڭ كوبى ولەرىندە سۇيەگىن ىستانبۇلعا اپارۋدى وسيەتتەپ كەتەتىندىكتەن، تۇرىك ەلىنە تابىتپەن عانا قايتىپ كەلەدى دەپ ايتۋعا بولادى. ال شۆەتسياعا بارعان تۇڭعىش قازاق بالاسى اتاقتى بالۋان قاجىمۇقان اتامىز ەكەنىن ءبارىمىز بىلەمىز. ول كىسى سپورت باسەكەسىنە وراي ستوكگولم قالاسىنا تابانى تيەدى. ال تۇركيا قازاقتارىنان تۇڭعىش بارعان ادام وسمان التاي (شىن اتى قۇسان - اۆت،. ) دەگەن اتامىز ەدى. وسىدان 3-4 اي بۇرىن 98 جاسىندا ومىردەن ءوتتى. ونىڭ ۇلى بريتانيانىڭ Shell مۇناي كومپانياسىندا جوعارى دارەجەلى باسشى بولىپ جۇمىس ىستەگەن. قازىر ەۋروپانىڭ مۇناي كومپانيالارى قاۋىمداستىعىندا قىزمەت ەتەدى.

- قازىرگى كارى قۇرلىقتاعى قانداستارىمىزدىڭ قارىم- قاتىناسى قانداي، مادەني ورتالىقتارى بەلسەندى جۇمىس ىستەپ تۇر ما؟

- جالپى كارى قۇرلىقتا ون مادەنيەت ورتالىعى بار. ولار نورۆەگيا، دانيا، گەرمانيا، فرانسيا، گوللانديا، بريتانيا، شۆەتسيا سەكىلدى ەلدەردە رەسمي تۇردە قۇرىلعان. سول ون ەلدە تۇراتىن قازاقتار جىل سايىن كەلىسىپ، ءبىر جەردە ەۋروپا فەدەراتسياسى اياسىندا كىشى قۇرىلتاي وتكىزىپ وتىرادى. سونداي-اق، جاستاردىڭ جاڭا جىل قارساڭىنداعى دەمالىستى پايدالانىپ كەزدەسۋ وتكىزەدى.

ەۋروپاداعى قازاق مادەني ورتالىعىنىڭ قۇرامىنا كىرەتىن ايەلدەردىڭ قولونەر ورتالىعى، جاستاردىڭ سپورت ورتالىعى، ءدىني ورتالىق، سوسىن قازاق مادەنيەتى ورتالىقتارى جۇمىس ىستەيدى.

- وسى ەلدەردەگى قازاق جاستارى قازاق ءتىلىن بىلە مە؟ ولار ءوزارا كەزدەسۋىندە قاي تىلدە سويلەسەدى؟

- جاستاردىڭ ءبارى تۇرىك ءتىلىن بىلەدى دەپ ايتۋعا بولادى. سوندىقتان ولارعا قازاقشا ۇيرەنۋ اسا قيىندىق تۋدىرمايدى. دەگەنمەن ەۋروپا فەدەراتسياسىنىڭ كەزدەسۋدە ورتاق ءتىل رەتىندە اعىلشىن ءتىلىن پايدالانادى.

- جالپى ەۋروپا دەپ ايتىپ جاتىرمىز عوي. سول قۇرلىقتا قازىرگى كەزدە قانشا قازاق تۇرادى؟

- فرانسيادا 700 دەن استام قازاق وتباسى بار. سانى جاعىنان ەكىنشى ورىندا گەرمانيانىڭ كەلن قالاسى، وندا 220 داي، ميۋنحەندە 40 شاقتى وتباسى، بەرليندە دە سولاي، ال شۆەتسيادا 100 ءۇي، دانيادا 15-20، گوللانديانىڭ امستەردام قالاسىندا 35-40 تاي قازاق وتباسى ءتۇتىنىن تۇتەتىپ وتىر. سوسىن لوندوندا دا وسى شامادا قازاق ءۇيى بار. ايتا كەتۋىم كەرەك، قازاق ەلى تاۋەلسىزدىك العالى بەرى قازاقستاننان دا قانداستارىمىز سول جاققا بارىپ، ءومىر ءسۇرىپ جاتىر. ءبىراق ولار بىزبەن ارالاسپايدى. سەبەبى قازاقستاننان ەۋروپاعا بارعان باۋىرلارىمىزدىڭ كوبى ورىس ءتىلدى بولعان سوڭ ءتىل تابىسۋ قيىنداۋ. قازاقستاندىق قازاقتار كەڭەستىك تانىم- تۇسىنىكتە، ال ءبىز ەۋروپاشا بولعاندىقتان، ءبارىمىزدى ءدىن ورتاقتاستىرار دەپ ويلاپ ەدىك، ول دا سەبەپ بولا المادى. تاماقتى دا، باسقانى دا مۇسىلمان بالاسى بولعان سوڭ بىزدەگى قازاقتار ويلانىپ، تالعاپ جەيدى. ال ورىسمىنەزدى جاستارعا ءبارىبىر ەكەن. ولار ويناپ-كۇلەتىن جەردى ىزدەپ تۇراتىن كورىنەدى... بۇعان بولا مەن رەنجىمەيمىن، ولاردا ءمىن جوق، ءمىن بولسا، سول جاستاردىڭ اكە-شەشەسىندە، وسكەن ورتاسىندا.

 مەنىڭشە، جالپى، ۇلتتى، مەملەكەتتى بىرىكتىرەتىن نارسە بولادى دەسەك، ول - ورتاق ءداستۇر، ورتاق ءدىن، ورتاق ءتىل. وسى ءۇش ورتاقتىقتان ءبىرتۇتاس ۇلت، ورتاق تۇسىنىك، ەلباسىمىز ۇنەمى ايتىپ جۇرگەندەي، بىرلىك، تۇراقتىلىق قالىپتاسادى. ارينە، ونداي تۇتاستىقتىڭ باسىن بالاباقشادان باستاۋ كەرەك. بۇل دامىعان باتىس ەلدەرىندە بار تاجىريبە.

- ءسىز قازىر ءومىر ءسۇرىپ جاتقان شۆەتسيا ەلىنىڭ ەكونوميكالىق جاعدايى، بۇرىنعى وتانىڭىز تۇركيامەن سالىستىرعاندا قانداي دەڭگەيدە؟

- مەن بۇدان قىرىق جىل بۇرىن بارعاندا شۆەتسيا ەلىنىڭ حالىق سانى 7.5 ميلليوننىڭ كولەمىندە بولعان. قازىردە سول شامادان اسا ۇزاققا بارعان جوق، 9 ميلليونعا ارەڭ جەتىپ وتىر. جالپى ەۋروپاداعى ەلدەردىڭ ەكونوميكالىق جاعدايى جامان ەمەس ەكەنى بارشا الەمگە بەلگىلى. الايدا وسى كارى قۇرلىقتاعى ءبىر كەلەلى ماسەلە بار. ولار وتباسى ساياساتىن ءومىر ءسۇرۋ باعدارلاماسىنا قوسپاعان. بالا تۋۋ ءۇشىن ۇيلەنۋ، وتباسىن قۇرۋ مىندەت ەمەس، بالاسىن تۋا بەرەدى (ارينە تۋسا). ەگەر جاقسى بولىپ جاتسا، ءارى قاراي نەكە كۋالىگىن الادى. ايتپەسە، ەكى جاققا كەتە سالادى. وتباسىلىق ماسەلەنى سوڭعى ورىنعا قويۋ - بۇل ولاردىڭ باستى ءھام ورتاق كەمشىلىكتەرىنىڭ ءبىرى شىعار دەپ ويلايمىن. مەنىڭ ويىمشا، وتباسىن قۇرۋ، بالا تاربيەلەۋدى ءبىرىنشى ورىنعا شىعارسا، جالپى ادامزات بالاسى دۇرىس باعىتقا جول تارتار ەدى. ال شۆەتسيا - كورولدىك رەجيىمدەگى ەل. ءبىراق كورول دەگەن ول سيمۆول. بۇل ەلدى ءىس جۇزىندە كوپ جىلدار بويى سوتسيال-دەموكراتتار پارتياسى باسقارىپ كەلدى. وسى كەزەڭدە شۆەتسيا ەكونوميكالىق ورلەۋ ءداۋىرىن باستان كەشىرىپ، الەمگە تانىلدى. اتالعان پارتيا 42 جىل ەلدى العا سۇيرەپ كەلدى. سوندىقتان دا شىعار قازىر دامىعان مەملەكەتتەر قاتارىندا...

- تۇركيا تۋرالى ايتىپ بەرسەڭىز...

- مەن زاڭدى تۇردە ەكى ەلدىڭ ازاماتىمىن. ءبىرى تۇركيا، ەكىنشىسى شۆەتسيا. سوندىقتان جىل سايىن تۇركياعا دا كەلىپ تۇرامىن. سوندىقتان بۇل ەلدىڭ جالپى جاعدايى مەن ءۇشىن بەيتانىس ەمەس.

تۇرىكتەر جاقىن ۋاقىتقا دەيىن جالپىعا مىندەتتى 5 جىلدىق وقۋدى قاناعات تۇتىپ كەلگەن-تىن. سونىڭ اسەرىنەن قاراپايىم حالىقتىڭ جارتىسىنا جۋىعى جوعارى وقۋعا قۇلىقتى بولماعان. سول بەس جىلدىقتى بىتىرگەن سوڭ ءارى قاراي ءۇي شارۋاسىنا كومەكتەسىپ بولماسا جەكە كاسىپتەر ىستەپ كەتە بەرگەن. تۇركيا - وتباسىلىق كاسىپتى ۇرپاقتان ۇرپاققا جالعاستىرىپ ىستەۋدى داستۇرگە اينالدىرعان ەل. مىسالى اكەسى جيھاز جاساۋمەن اينالىساتىن نەمەسە مەيرامحانا قوجايىنى بولسا، بالاسى دا سول كاسىپتى جالعاستىرۋعا كىشكەنتاي كەزىنەن دايىندالادى. سول ارقىلى كەز كەلگەن تۇرىك ازاماتى بولاشاقتا كىم بولام دەپ باسىن قاتىرمايدى، ج و و- دا وقىپ، ءوز ءومىرىنىڭ ازىعىن تابۋدى كوزدەمەيدى. بۇنداي وتباسىلىق كاسىپتى جالعاستىرۋ بۇكىل ەلدىڭ ەكونوميكاسىنىڭ تۇراقتى دامۋىنا پايدالى بولعانىمەن، كوپشىلىك قاۋىمنىڭ جوعارى ءبىلىم الۋعا دەگەن ىنتاسىن تومەندەتكەن سياقتى. ءداستۇرلى كاسىپتى جالعاستىرۋشىلار ءۇشىن بالانىڭ ۇزاق جىلدار وقىپ، ج و و- دا ءبىلىمىن شىڭداۋ ءبىر قاراعاندا بوس اۋرەشىلىك سياقتى بولىپ كورىنەدى.

ال ەندى ارتىقشىلىعى جاعىن ايتار بولساق، ەكونوميكاسى دامىعان ەل. ونى جۇرتتىڭ ءبارى بىلەدى. جالپى ەۋروپادا دامىعان وتىزدان استام ەل بار بولسا، سونىڭ ىشىندە تۇرىك ەلى الدىڭعى قاتاردا. بۇل جەردە «تۇركيا وسىنداي دەڭگەيگە قايتىپ جەتتى؟» دەگەن سۇراق تۋۋى زاڭدى. ولار تۋريزمدى وتە جاقسى دامىتقان، سوسىن تۇرىك حالقى «ساۋدانىڭ تەگىن» بىلەدى. وتە ەڭبەكقور، كەز كەلگەن ساۋدا ورتالىعىندا قىزمەت كورسەتۋ جوعارى دەڭگەيدە. ول جاعىنان، قازاقشا ايتقاندا، الدىنا جان سالمايدى. مىنە ارتىقشىلىعى وسى. ودان كەيىن بۇلار سوڭعى جىلدارى جالپىعا مىندەتتى ءبىلىم الۋدى 5 جىلدان 11 جىلعا ۇلعايتتى. مەكتەپتە بۇكىل تۇركى تاريحى جاقسى وقىتىلادى. وزدەرىنىڭ ارعى تەگى كىم ەكەنىن، قايدان شىققانى تۋرالى تەرەڭ تۇسىندىرىلەدى. ال وسىنداي تاريحتى وقىعان جاستارىنىڭ دا، كارىلەرىنىڭ دە قازاق حالقىنا دەگەن قۇرمەتى بولەك بولادى. ويتكەنى ولاردىڭ سانالارىندا وسى كۇنگە دەيىن ازعىنداماي، باسقا ۇلتتاردىڭ ىقپالىنا قاتتى ۇشىراماي كەلگەن اتالارىمىز قازاق دەگەن تانىم بار. ارينە بۇل تۇرىك بىتكەن قازاقتى قۇدايىنداي كورەدى دەگەن ءسوزىم ەمەس، تاريحتى ساناسىنا سىڭىرە بىلگەنى ءبىزدىڭ ۇلتىمىزعا قۇرمەتپەن قارايدى دەگەنىم.

- ماحمۇت اعا، ءوز وتباسىڭىز تۋرالى ايتىپ بەرسەڭىز. بالالارىڭىز قازىر قايدا تۇرادى، ءوز وتانىنا كەلگەندەرى بار ما؟

- شەت ەلدە تۇرعان ەستى قازاقتاردىڭ ورتاق ءبىر ۋايىمى بار. «بولاشاقتا ۇرپاقتارىمىز كىم بولادى؟» دەگەن. ءبىزدىڭ جاستارىمىز قازىردىڭ وزىندە اسسيميلياتسيانىڭ كۇشتى اسەرىنە ۇشىراپ بارادى. ۇلت، ءدىن تۋراسىنداعى تانىم-تۇسىنىكتەرى كىسى الاڭدايتىنداي دەڭگەيگە جەتكەن.

شۆەتسيا ەلىندەگى تۋعان ءتىلىن، ءداستۇرىن، ءدىنىن ۇمىتقان، ءوزىنىڭ كىم ەكەنىن بىلمەيتىن شەتەلدىكتەردى كوپ كوردىك. ولاردىڭ بۇلاي بولۋىنا اۋەلدە اتا-اناسى ءمان بەرمەگەن. سودان وسى كۇيگە جەتكەن. بۇل مەن ءۇشىن وتە قورقىنىشتى نارسە. سەبەبى مەنىڭ اكەم يمانعالي سارباس شىنجاڭنان ۇدەرە كوشكەن ەلمەن بىرگە، ادام تۇگىلى اسپانداعى قۇستىڭ ءوزى ۇشىپ وتە المايتىن گيمالاي تاۋىنان ءوتىپ، شەتەل استى. سونداعى ولاردىڭ ماقساتى - قوراسىنداعى مالى نەمەسە قارا باستارىنىڭ قامى ەمەس-تىن. بەيبىت ءومىر مەن ءوز ۇرپاقتارىنىڭ بولاشاعى ءۇشىن كۇرەسۋ ەدى. ال ەندى مەن نەگە بۇگىنگىدەي باياناتتى ومىرىمىزدە ءوز ۇرپاقتارىم تۋرالى تالپىنباۋىم كەرەك؟

قازاقستان تاۋەلسىزدىك العان سوڭ مەن وسىنداي ويعا كەلدىم. ءسويتىپ ءبىر قىزىمدى قازاقستانداعى ج و و- دا وقىتتىم. ونىڭ ناتيجەسى جامان بولعان جوق، باستىسى قىزىم ءوزى بىلمەيتىن انا ءتىلىن، ءدىنىن، ءداستۇرىن بىلگەن تولىق ادام بولىپ شىقتى. قازىر قازاقستانداعى نورۆەگيا ەلشىلىگىندە جۇمىس ىستەيدى. ەلگە تۇركيادان كەلگەن قازاققا تۇرمىسقا شىقتى. ولاردىڭ ءۇش بالاسى بار، استانادا تۇرادى. مەن 2000 -جىلدارى ەۋروپاداعى وقۋى، ەكونوميكاسى دامىعان ەلدە تۇرىپ، ەندى عانا تاۋەلسىزدىك الىپ، ەسىن جيىپ كەلە جاتقان قازاقستانعا وسى قىزىمدى اقشاسىن تولەپ وقىتام دەپ الىپ كەلگەندە كوبىسى تاڭعالعان ەدى. بۇگىنگىدەي نارىقتىق زاماندا بۇل بوس شىعىن دەپ ويلادى. ءبىراق مەنىڭ قىزىم ءبىرىنشى جىلى اقىلى وقىعانىمەن، كەلەسى جىلى ءوز تالپىنىسىنىڭ ارقاسىندا گرانتتى ۇتىپ الدى. بەس جىلدان كەيىن ول ءوزى بىلەتىن اعىلشىن، شۆەد تىلىنەن وزگە قازاق، ورىس تىلدەرىن يگەرىپ قازاق ەلىنە پايداسى تيەتىندەي مامان بولىپ شىقتى. سونداي-اق، وسى جاقتا تۇرىپ قالۋىنا جول اشىلدى. بۇل، ارينە، مەنىڭ نەگىزگى جوسپارىم ەدى.

جاس كەزىمدە قازىرگى كەيبىر ادامدار سەكىلدى ۇلتىمدى ۇمىتىپ، ءوزىمدى شۆەدپىن، شۆەتسيالىق ازاماتپىن دەپ ويلاعام. ءبىراق ەسەيىپ، ەس جيعان سوڭ، ادامعا نە كەرەك ەكەنىنە كوزىم جەتتى. مىنا دۇنيەدە تولىققاندى ادام دەگەن تۇسىنىك بار. تولىققاندى ادام بولۋ - ءوزىنىڭ ءتىلىن، سالت-ءداستۇرىن، ءدىنىن ءبىلىپ عانا قويماي، ولاردى جانىندا ساقتاۋ كەرەك ەكەنىن سەزىندىم... مەنىڭ قالعان ءۇش بالام قازىر شۆەتسيادا تۇرادى. ەكەۋى وتباسىن قۇرعان. ولاردى جاس كۇنىنەن بەرى جىل سايىن ءبىر ايداي ۋاقىت تۇركياعا اكەلىپ تۇراتىنمىن. ونداعى ويىم - ازاننىڭ داۋىسىن ەستىسىن، قۇلاعىنا ءسىڭسىن، وزدەرىنىڭ مۇسىلمان ەكەنىن، قازاق دەگەن ۇلتتىڭ ۇرپاقتارى ەكەنىن ءبىلسىن دەگەنىم ەدى. قازىردە سول وتباسىلىق ءداستۇرىمدى جالعاستىرىپ كەلەمىن.

- اڭگىمەڭىزگە راقمەت!

 سۇحباتتاسقان بەيسەن سۇلتان ۇلى

 Басты сөздер: شەتەل قازاقتارى
Нравится
پئكئر قالدئرؤ
پئكئر قالدئرؤ
اتئ


كود وسئ باس ارئپتةردئ جوعارئعا كوشئرئپ جازؤ
*كودتئ ةنگئزئثئز

سونداي-اق... وقئثئز
ەسەنعالي راۋشانوۆ: ولەڭ تۋعان اناڭداي قادىرلى بولۋى كەرەك

استانا. قازاقپارات - اقىن ەسەنعالي راۋشانوۆ بۇگىنگى قوعامنىڭ، شىعارماشىل ورتانىڭ بارومەترى سياقتى. ويىن ىركىمەي ايتىپ جۇرەدى. بۇرىندارى اعامىزعا ارا- تۇرا بولسىن كىرىپ، اڭگىمەسىن تىڭداپ تۇراتىنبىز. ەكى جىلداي ۋاقىت ات ءىزىن سالماي كەتىپپىز.

كوپ وقئلعاندارئ

پئكئر بئلدئرئلگةن ماقالالار




قازاقپارات ذلتتئق كومپانياسئ اكسيونةرلئك قوعامئ
Яндекс.Метрика
قازاقپارات ذلتتئق كومپانياسئ اكسيونةرلئك قوعامئنئث ماتةريالدارئن كومپانيا باسشئلئعئنئث جازباشا رذقساتئنسئز پايدالانؤعا تئيئم سالئنادئ