ҚЫЗЫЛОРДА. Шілденің 31-і. ҚазАқпарат /Руслан Игілік/ - Кеше Қызылорда облыстық әкімдігінде «Батыс Еуропа - Батыс Қытай» күре жо­лының құрылысына байланысты республикалық штабтың көшпелі мәжілісі болып өтті. Оған Көлік және коммуникация вице-министрі Дулат Көтербеков пен бас­қа жауапты мекеме және мердігер компаниялар басшылары қатысты.

Қазіргі таңда Мемлекет басшысының қолдауымен қолға алынған іргелі жобаны жүзеге асыруға барынша көңіл бөлініп отыр. Алып жол құры­лысының Сыр өңірінің үстінен өтетін бөлігіндегі атқарылатын жұмыстар барысына облыс басшылығы тарапынан баса назар аударылуда.

Көлік және коммуникация вице-министрі ұзындығы 5847 шақырымды құрайтын трансқұрлықтық дәліздің құрылысына байланысты бүгінгі таңда нақты істер қолға алынған деді. Бұл мақсатта түрлі қаржы көздерінен ақша уақтылы бөлініп отыр. Сондықтан жол құрылысын дер мезгілінде сапалы атқарып шығуға барлық мүмкіндік бар.

Республикалық автокөлік жолдары комитеті облыстық департаментінің директоры міндетін атқарушы Шан­жархан Мырзабай күре жол құрылысы бойынша қазірге дейін атқарылып жатқан жұмыстар жайлы хабарлама жасады. Облыс көлемінде бас-аяғы 817 шақырымға созылатын халықаралық транзит дәлізінің 242 шақырымы бірінші техникалық, 575 шақырымы екінші деңгейге жеткізіледі. Соңғы деректер бойынша облыс көлемінде 336 шақырым жоғарғы құнарлы жер төсемі алынды. Жалпы ұзындығы 107 шақырым айналма жолдар салынды. Бүгінгі күнге дейін 4229 мың текше метр жер төсемі төселді. Сондай-ақ, 32 су өткізетін құбырлар орнатылды. Жол-құрылыс материал­дарын дайындау қарқынды жүргізілуде. Атап айтқанда, 810 мың тонна құм-қиыршық тас қоспасы мен 691 мың тонна қиыршық тас дайындалды. Алып құрылысқа барлығы 1738 техника жұмылдырылған.

Жол салу аймақтың дамуына елеулі әсерін тигізіп отыр. Жоба қолға алынғалы бері облыста бір­қатар жаңа өндіріс орындары тұ­сауын кесті. Олардың қатарында «Шалқия» кен орнындағы қиыршық тас шығаратын зауыт пен УАД ЖШС-нің битум зауыты секілді орындар бар. Қазірге дейін жоспар­лан­ған 20 асфальт-бетон зауытының 8-і жұмыс жасауда. Жоба­ны жүзеге асыру барысында 15171 адам еңбек­пен қамтылды. Оның жар­ты­сынан астамы жергілікті тұрғын­дар болып табылады.

Осыдан кейін облыс көлемінде жұмыс жүргізетін «Салини», «Ак­корд-Окан», «Импреза» және «То­дини» компания­ларының басшылары Арнальдо Ди Верджило, Явуз Уйсал, Мастро­чинкуе Мике­ланжело, Алманьо Фабио өздерінің атқарып жатқан жұмыстары жөнінде тілге тиек етті. Кө­лік және комму­ни­кация министрлігі­нің вице-министрі аталған компанияларға байланысты бірқатар сын-ескертпесін жасады. Атап айтқанда, шетелдік мер­ді­герлер тарапынан бірқатар кемші­ліктер орын алған. Кейбір компания­лар өздеріне бекітілген аумақтағы жұмыс­тарды мерзімінен кешіктіріп атқарып келеді. Бұл келеңсіздік «Импреза» жә­не «Аккорд-Окан» ком­панияларына тән құбылыс. Вице-министрдің «Импреза» компаниясы басшысына «Бүгінгі күні уа­қы­тынан кешіктірілген жұмысты қашан орны­на келтіресіз» деген сауа­лына нақты жауап бола қойған жоқ. Сондай-ақ, Жаңақорған ауданының аумағында жол салып жатқан итальян­дық «Тодини» компаниясы тарапынан да кеткен олқылықтар бар. Нақтылай айтқанда, олар жұмысшы­ларға әлеуметтік жағдай жасауға байла­ныс­ты кемшіліктерге жол берген. Вице-министр бұл мәселе әрдайым басты назарда ұсталатынын жеткізді.

Мәжіліс соңында Д.Көтербеков келешекте еліміз үшін ең маңызды көлік дәлізіне айналатын жол құры­лысы өз деңгейінде атқарылатынын айтып өтті. Осы мақсатта құзырлы орындар тарапынан бақылау жаса­лып отырады. Осындай талаптар бойынша жұмыс жүргізе алмаған компания­лар­ға тиісті шаралар қол­данылады.