Женевада сирияаралық келіссөздер басталды
Бір жылдық үзіліс және Астанадағы жаңа келіссөз алаңы пайда болғаннан кейін өтіп жатқан кездесудің басты тақырыбы Сирияда жаңа үкімет құру, ел конституциясының жаңа жобалары мен сайлау өткізу болмақ.
Женевадағы талқылаудың форматы ресми түрде жарияланбады. Оппозиция талап еткендей, тікелей кездесулер бола ма, әлде арнайы елші әрқайсысымен жеке кездесіп, аралық дипломатия тәжірибесін жалғастыра ма, белгісіз. Де Мистураның өзі жақында болған баспасөз мәслихатында өз кестесін, тіпті бейсенбі күнгі жоспарларын жарияламады. Оның айтуынша, бүгінгі күннің бірінші жартысында делегациялармен кездескеннен соң, формат мәселесін шешеді.
Сонымен бірге, келіссөздер ұйымдастырушыларына жақын ақпарат көзі РИА Новости агенттігіне бүгін 15:00-де (Астана уақытымен 20:00-де) келіссөздер қатысушыларының де Мистура алғысөзіне жиналатынын хабарлады. Оған Сирияға қолдау көрсететін халықаралық топқа мүше мемлекет өкілдері де келуі мүмкін.