Жас ғалым: Экономиканың ақпараттық технология арқылы дамуы - әлемдік жол
«Елбасының биылғы Жолдауы еліміздегі төртінші өнеркəсіптік революция жағдайын дамытуға арналды. Сонымен қатар оны жүзеге асыруға бағытталған негізгі 10 міндет те атап өтілді. Бүгінгі күні заманауи технологиялардың қарқынды дамуына байланысты әлем көз ілеспес жылдамдықпен өзгеріп жатыр. Негізгі міндеттердің басым бөлігінде әртүрлі салаларда заманауи технологияларды пайдалана отырып, цифрландыру арқылы экономикалық және индустриялық дамуды жүзеге асыру айқындалды. Оның ішінде индустрияландыру жаңа технологияларды енгізудің көшбасшысына айналуы тиіс екені аталды», - деп атап өтті ол.
Сәбит Ибадулланың айтуынша, облыс әкімдігінің қолдауымен ақпараттық технологияларға қызығушылығы бар жергілікті жастарға арнап «HackDay» конкурсы ұйымдастырылған. Аймақта ІТ бағыттағы жұмыстарды жандандыру мақсатында өңірлік кеңес құрылып, жұмыс атқарып келеді.
Қорқыт ата атындағы Қызылорда мемлекеттік университетінің басшылығы ақпараттық технологиялардың еліміздің экономикалық үдерісінде алатын орнын ескере келе, үздік түлектерді шетелдік жоғары оқу орындарына университеттің арнаулы қаржысы есебінен жіберіп келеді.
«Осы бағдарлама арқылы мен Мәскеу қаласындағы Ресей халықтар достығы университетінде робототехника бойынша PhD докторантурада оқыдым. Ғылыми бағытымдағы мәселер мен шешімдер осы Жолдаудың негізгі міндеттеріне енгенін қуанышпен қабылдадым.
Экономиканың ақпараттық технология арқылы дамуы - әлемдік жол. Осы жолға қадам басуға арналған Жолдаудың орны ерекше. Әсіресе, негізгі 1-ші міндетті IT саласындағы мамандар шын ниетімізбен қолдаймыз және жүзеге асыруға күш жұмылдырамыз. Жас мамандар жаңа технологияларды жылдам әрі сапалы түрде игеріп, бүкіл әлемде Қазақстанның IT бағытын жоғары көрсеткіштермен танытуға жұмыс жасауға дайын», - деді жас ғалым.