Жамбылдық басшы 160 миллион теңгенің субсидиясын туыстарына бөліп берген

ТАРАЗ. ҚазАқпарат - ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің облыстық департаменті Жамбыл облысында субсидиялардың заңсыз бөлінуін анықтады, деп хабарлайды ҚазАқпарат тілшісі ведомствоның баспасөз қызметіне сілтеме жасап.

Департамент өкілдерінің айтуынша, Шу ауданы әкімдігінің ауыл шаруашылығы бөлімінің басшысы С. Сейдахметов жанар-жағармайлар үшін 160 млн теңге мөлшеріндегі субсидияны заңсыз бөлген.

Ауданда ең ірі мөлшердегі субсидиялар 2014-2016 жылдар аралығында «Бектібай», «Бектібай-1», «Самат» және «Еркін» шаруа қожалықтарына берілген. Тексерулер кезінде субсидияларды Сейдахметовтің жақын туыстары: ағасы, жеңгесі, әйелі және баласы алғаны анықталды.

Департамент С. Сейдахметовті жұмысынан босатты.

Қазір оған қатысты қылмыстық іс қозғалған.