«Үздік мемлекеттік қызметші» атанған жас мамандарды шетелге демалысқа жіберу ұсынылды
Шараға Ақмола, Қостанай, Қарағанды, Солтүстік Қазақстан облыстары жəне Астана қаласынан келген 150-ден астам жас мемлекеттік қызметшілер қатысты.
Форум форматы диалог күйінде өтті. Мəлік Мырзалин жастармен өзінің өмірлік тәжірибесімен бөлісіп, мемлекеттік қызметке алғаш келгендегі әсерін еске алды. Аймақ басшысы мемлекетке қызмет етуде талмай еңбектену қажеттігін атап өтті.
«Бүгінгі жастардың алға қойған мақсатына жету үшін елімізде барлық мүмкіндіктер қарастырылған. Тек оған ерінбей еңбектену керек», - деді ол.
Шарада мемелекеттік қызмет ардагері Марат Құлмағамбетов мемлекеттік қызметшілердің арасында жыл сайын өтетін «Үздік мемлекеттік қызметші» сайысында озып шыққан жастарға шетелге курортқа тегін демалыс билетін үйлестіру туралы пікірін білдірді. Өз кезегінде М. Мырзалин идеяны қолдап, жастарды курорттан гөрі, тәжірибе алмасуға шетелге жіберуді жөн санады.
Сондай-ақ форумда ҚР Мемлекеттік қызмет агенттігінің аппарат басшысы Саян Ахметжанов пен «Жігер» жас мемлекеттік қызметшілер клубының президенті Диана Серғазина сөз сөйледі.
Жастар өздерін толғандырған сауалдар қойып, оған тұщымды жауаптар алды. Ал шара соңында Қарағанды облысынан келген Медет Қараметов, өзінің форумға арнаған өлеңін оқып берді.
Шараның екінші күнінде жастар «Рухани жаңғыру» бағдарламасы аясында Бурабайдың киелі орындарын аралайтын болады.