Түркістанда өткен аламан айтыста Айбек Қалиев жеңімпаз атанды

None
None
ШЫМКЕНТ. ҚазАқпарат - Түркістанда өткен аламан айтыстың жеңімпаздары белгілі болды. Түркітілдес мемлекеттер арасындағы ұйымдастырылған жыр додасында бас жүлдеге Қостанай облысының ақыны Айбек Қалиев ие болды. Оған арнайы Алғыс хат пен 3 млн теңгенің сертификаты табысталды, деп хабарлайды ҚазАқпарат ХАА тілшісі.



Айта кетейік, екі күнге созылған аламан айтыста аты алты алашқа мәлім Қырғызстан, Өзбекстан, Түркия және Қазақстан елдерінің 20 ақыны қатысты. Олардың арасында көрші қырғыз елінен Асылбек Маратов пен Болот Назаров келсе, Құлмахан Дүйсенов Өзбекстан Республикасынан қатысты. Ал, Сара Тоқтамысова (Астана қаласы), Сырым Әуесхан (Астана қаласы), Айбек Қалиев (Қостанай облысы), Ботагөз Мұхиддинқызы (Қарағанды облысы), Алтынкүл Қасымбекова (Жамбыл облысы), Бибігүл Тілепалдинова (Алматы қаласы), Бекарыс Шойбеков (ОҚО), Жарқынбек Наушабеков (ОҚО), Карима Оралова (ОҚО), Қажымұхан Абзалов (ОҚО), Біржан Байтуов (ОҚО), Нұрлан Есенқұлов (ОҚО), Анар Жаппарқұлова (ОҚО), Дәурен Полатбаев (ОҚО), Нұрлыбек Мейірманов (ОҚО), Тұрар Тілеулиев (ОҚО), Нұрғали Әнапия (ОҚО) сынды 12 ақын елдің атынан шығып, айтысты. Ақындар елдің бірлігі мен ынтымағы, бауырлас елдер арасындағы берік ымыра мен ауызбіршілік жайында кеңінен жырлай келе, қағытпа әзіл, қисыннан жол тапқан тапқырлықтарымен елдің ықыласына бөленді.





Қазылар алқасының шешімімен айтыстың бірінші орны Оңтүстік Қазақстан облысының ақыны Жарқынбек Наушабековке бұйырып, ол 2 миллион теңге көлеміндегі сыйлықты иеленді. Сонымен қатар, Қырғызстан Республикасынан келген Асылбек Маратов пен оңтүстікқазақстандық Нұрлан Есенқұловтар екінші орынға лайық деп танылды. Қос ақын да 1,5 миллион теңгеден жеңіп алды. Қырғыз ақыны Болот Назаров пен арқа жұртының арқалы ақындары Сара Тоқтамысова мен Сырым Әуесхан үшінші орынды иемденді. Оларға да ақшалай сыйлық ретінде 1 миллион теңгенің сертификаты берілді. Бұдан бөлек, «Қазыбек би» атындағы арнайы жүлде Анар Жаппарқұлованың еншісіне тиесілі болса, «ТҮРКСОЙ» ұйымы атындағы жүлде Түркістанның азулы ақыны Бекарыс Шойбековке бұйырды. Аламан айтыста айрықша сөз саптаған ақындар Біржан Байтуов пен Қажымұқан Абзалов және Нұрғали Әнапияларға арнайы жүлде ретінде 500 мың теңгеден табысталды.





Еске салайық, «Түркістан - Түркі әлемінің мәдени астанасы» жылы аясында өткен айтыс Қазыбек би Келдібекұлының 350 жылдығына және «Наурыз» мейрамына орай ұйымдастырылды. Қ.А.Ясауи атындағы Халықаралық қазақ-түрік университетінің Мәдениет орталығында өткен айтыстың құрылтайшысы - Қазақстан Республикасының Мәдениет және спорт министрлігі мен ТҮРКСОЙ Халықаралық ұйымы, ОҚО әкімдігі мен өңірдің мәдениет басқармасы болды.

 

Соңғы жаңалықтар