Трансформациялау бағдарламасы қазақстандық компанияларға не береді

АСТАНА. ҚазАқпарат - «Самұрық-Қазына» акционерлік қоғамы басқармасына қарасты компанияларға енгізілгелі жатқан трансформациялау бағдарламасы бизнеске 100 пайыздық пайда әкеледі. Бұл туралы «Самұрық-Қазына» АҚ басқарма төрағасы Өмірзақ Шөкеев трансформациялау бойынша атқарушы комитеттің отырысында атап өтті, деп хабарлайды «ҚазАқпарат» ХАА тілшісі.

Басқарма төрағасының айтуына қарағанда, трансформациялау бағдарламасы бизнесті 100 пайыз алға сүйрейді.

«Бағдарламаның әр жобасының өзіндік пайдасы бар. Бұл жобаларды айналысып жатқан адамдардың ісімен дәлелденген. Біз трансформациялау арқылы 100 пайыздық пайдаға жететінімізді біліп отырмыз. Біз бүгін айтып отырған жобалар - процестің бір бөлігі ғана. Мұны барлығын түсіну керек», -дейді холдинг басшысы.

Өмірзақ Шөкеевтің айтуынша, трансформациялау қызметтік міндеттемелерді реттей отырып, ортақ экономикалық өсімді қамтамасыз етеді.

«Трансформациялауды көп адамдар түсініксіз идея деп ұғып жүруі мүмкін. Іс жүзінде трансформациялау - шағын жобаларға бөлінген өте пайдалы жоба. Қызметкерлердің әрқайсысы өз ісімен ғана айналысып, түпкі мақсатын білетін болады», - дейді ол.

Сонымен бірге, холдинг басшысы трансформациялау процесі сарапшылардың үздік буынын қалыптастыратынына сенім білдірді.

«Трансформациялау процесі өзіне көптеп менеджерлерді тартып жатыр. Мені солардың көбі жас бола отырып, кәсіби тұрғыда шыңдала түскені қуантады. Біздің бүгінгі комитеттің бір артықшылығы - баяндамалардың басым бөлігін директорлар ғана емес, олардың командасындағы жас мамандар жасасын деп қалауымды білдірдім», - дейді Өмірзақ Шөкеев.

Айта кетсек, бұдан бұрын Өмірзақ Шөкеев барлық ұйымдар, коммерциялық компаниялар трансформациялау бағдарламасы негізінде үш бағытта дами алатынын мәлім еткен болатын. Олар: менеджерлердің сапасы, процестердің сапасы мен технологиялар.

«Барлық бизнес осы үш бағытқа тәуелді», - дейді ӨмірзақШөкеев.