Теміртауда өнеркәсіптік газдардың өндірісі кеңейтілетін болады
Онда алдағы екі жылда жүзеге асырылады деп жоспарланған жобалар ұсынылды, деп хабарлайды өңір әкімдігінің ресми сайты.
- Бұл Кеңестің төртінші отырысы. Аталмыш орган инвесторларды қолдау, жобаларды жүзеге асыруда кездесетін проблемалық мәселелерді шешу үшін құрылған, - деп атап өтті облыс әкімінің орынбасары Алмас Айдаров.
Кеңестің үшінші отырысында берілген тапсырмалардың орындалуы туралы Өнеркәсіп және индустриалды-инновациялық даму басқармасының басшысы Ғалымжан Жұмасұлтанов мәлімдеді. Сонан соң инвестициялық жобалар таныстырылды.
Теміртауда «LindeGasKazakhstan» ЖШС ауаны бөлгіш құрылғының екінші кезегін салу» жобасы жүзеге асырылады.
- Біздің өндіріс іс жүзінде жұмыс істеп тұр. Бірінші блок 2013-ші жылы қолданысқа енгізілген болатын. Біз оттек, азот және аргон өндіреміз. Негізгі клиентіміз "АрселорМиттал Теміртау" АҚ. Өнім негізінен ішкі нарыққа барады және де жақын шет елдерге экспортталады. Ресей, Қырғызстан, Өзбекстан, Әзербайжан елдеріне, - деді жобаның жетекшісі Руслан Филиппов. - Қазіргі таңда өндірісті кеңейту бойынша жаңа жобаны жүзеге асырып жатырмыз. Екінші блокты іске қосу 2019-шы жылдың соңына жоспарланып отыр».
Оның айтуынша, инвестициялар шамамен 70 млн еуроны құрайды. Қазіргі күні жобалық-сметалық құжатты жасау жұмыстары аяқталуға жақын, ол соңыра мемлкеттік сараптамаға жіберілетін болады.
Облыс әкімінің орынбасары инвестор билік тарапынан қажетті көмек алатынын айтты.
- Бұл біз үшін өте маңызды жоба, - деді Алмас Айдаров. - Linde тобы әлемдегі ең ірі техникалық газ тасымалдаушылардың бірі болып табылады. Компанияның кеңеюге және инвестиция құюға деген ниеттері өте маңызды қадам. Жер телімдерін бөлуге қатысты сұрақтар туындаған болатын. Қазір олар шешімін тапты. Қазір ең бастысы - рұқсат рәсімдерінен барынша жылдам өту.
Сондай-ақ отырыс барысында жалпы құны 7 млрд теңгені құрайтын «ForeverFourshingCo. Ltd.» ЖШС металл еріту зауытының құрылысы" жобасы ұсынылды. Жаңа зауыт Қарағандыда қытайлық серіктестердің көмегімен салынып жатыр. Жаңа өндіріс орны 200 жұмыс орнын ұсынады.
Облыс орталығында жүзеге асырылатын тағы бір жоба автокөліктерді сату және сервистік қызметке қатысты. Ірі заманауи автоорталық салынады деп жоспарлануда, онда «BMW» «Subaru» «Hyundai» маркалы автокөліктер сатылып, оларға қызмет көрсетілетін болады. Құны 1,2 млрд теңгені құрайтын жобаның бастамашысы «EurasiamotorsKaraganda» ЖШС. Автоорталықтың бірінші корпусының құрылысы 2019-шы жылдың күзінде аяқталады.