Теміртау оқушылары асханадағы тамақтан бас тартуда

ҚАРАҒАНДЫ. ҚазАқпарат - Теміртаудағы классикалық лицей асханасын тексеру кезінде одан ішек таяқшаларының бактериялары табылды, деп хабарлайды ҚазАқпарат тілшісі.

Қоғамдық денсаулықты қорғау басқармасы мамандарының жоспардан тыс тексеруінің нәтижесінде, асханада қолданылатын ыдыс-аяқтардан, жиһаздардан, аспаздардың арнайы жұмыс киімдерінен бактериялар анықталды.

«Бұл анықталған жағдайлар қоғамдық тамақтану орнының санитарлық талаптарды сақтамай отырғандығын көрсетеді», - деді  қоғамдық денсаулықты қорғау басқармасының маманы.

Оның үстіне, асханадан пайдалану мерзімі өткен азық-түліктер табылған. Сондай-ақ, қауіпсіздік туралы куәлігі жоқ өнімдер де анықталған. Дайын өнімнің құнарлылығы мен майлылығын зерттеуге арналған сынама нәтижесі оның нормаларға сәйкес келмейтіндігін көрсеткен.

Асхананы жоспардан тыс тексеруге оқушылардың ата-аналарының түсірген шағымдары себеп болған.