Ауа райы
Астана 5 °С
Алматы 12 °С
валюта бағамы
USD 311.89
EUR 339.02
RUB 5.59
CNY 45.30

Театр саңлағы, ҚР халық артисі Асанәлі Әшімов 80 жасқа толады

Театр саңлағы, ҚР халық артисі Асанәлі Әшімов 80 жасқа толады
2017 жылғы 21 сәуір 11:15 2864

АСТАНА. ҚазАқпарат - 12 мамыр күні М.Әуезов атындағы Қазақ Мемлекеттік академиялық драма театрында  көрнекті актер, режиссер, Қазақстан және КСРО халық артисі, Мемлекеттік сыйлықтардың лауреаты Асанәлі Әшімовтің 80 жасқа толуына орай салтанатты кеш өтеді, деп хабарлайды ҚазАқпарат.

Асанәлі Әшімов 1937 жылы 8 мамырда Жамбыл облысы, Сарысу ауданы,  Саудакент (бұрынғы Байқадам) ауылында дүниеге келген. 1956-1961 жылдары Құрманғазы атындағы Қазақ ұлттық консерваториясының театр факультетін актер мамандығы бойынша оқып-бітіріп,  «Қазақфильм» киностудиясына актерлік штатқа қабылданады. Ал 1964 жылдан бері М.Әуезов атындағы Қазақ Мемлекеттік академиялық драма театрында үзіліссіз еңбек етіп келеді.

Театрда негізінен басты рольдерді сомдаған актер М.Әуезовтің «Абайында» Айдар, Керім, «Еңлік-Кебегінде» - Кебек, «Қарақыпшақ Қобыландысында» - Айшуақ,  «Таңғы жарығында» - Жарасбай, Ғ.Мүсіреповтің «Қозы Көрпеш -Баян сұлуында» - Қодар, Н.Хикметтің «Елеусіз қалған есіл ерінде» - Ассистент, Қ.Мұхамеджановтың «Жат елде» драмасында - Асан ақын,  Т.Ахтановтың «Боранында» - Қасболат,  Ш.Айтматов пен Қ.Мұхамеджановтың «Көктөбедегі кездесуінде» - Иосиф Татаевич, Ә.Нұрпейісовтің «Қан мен терінде»  - Еламан,  Ә.Таразидің «Күлмейтін комедиясында» - Сәнжан, И.Вовнянконың «Апатында» - Асан қарт, Шекспирдің «Юлий Цезарінде» - Юлий Цезарь, М.Фриштің «Дон Жуанның думанында» - Дон Жуан, Г.Гауптманның «Ымырттағы махаббатында» доктор Клаузен және т.б. көптеген рольдерімен ұлттық актерлік мектептің дамуына өлшеусіз үлес қосты.

Отыздан аса фильмге түскен актерд қазақ кино өнерін жаңа белестерге  көтеру үшін көп еңбек сіңірді.  Ұлттық киноның төлқұжатындай болған «Қыз Жібектегі» Бекежан,  «Атаманның ақыры» мен «Транссібір жүрдек пойызындағы»  Қасымхан Шадияров бейнелері оның есімін шет елдерде танымал етті.

А.Әшімов театр мен кино саласында режиссерлік қызмет етуімен қатар, өнер қайраткері ретінде еліміздегі және шетелдердегі мәдени шараларға белсенді ат салысады. Сонымен қатар,  Т.Жүргенов атындағы Қазақ Ұлттық өнер академиясында  дәріс беріп, театр өнерінің дамуына өзіндік үлес қосып жүрген, көптеген шәкірттерді тәрбиелеген  ұлағатты ұстаз.

Актердің тағы бір қыры - жазушылық. Оның «Майраның әні» (1995), 5 томдық шығармалар жинағы (2007), «С любовью, Ваш Асанали Ашимов» (2008),  «Ғұмыр-дария» (2012) жинақтары қалың оқырманның сүйікті шығармаларына айналды.

А.Әшімов бүгінгі таңда М.Әуезов атындағы Қазақ Мемлекеттік академиялық драма театрының көркемдік жетекшісі және Қазақстан Театрлар қауымдастығының төрағасы ретінде ұлттық сахна өнерінің өркендеуіне мол тәжірибесімен, абырой-беделімен елеулі үлес қосып жүр.

Асанәлі Әшімовтің ұлттық өнерге қосқан орасан зор еңбегі мемлекет тарапынан жоғары бағаланды.  Ол Қазақстанның халық артисі (1976), КСРО халық артисі (1980), сондай-ақ «Тарлан» тәуелсіз сыйлығымен (2000), «Отан» (2001), «Құрмет» (2007), «Парасат» (2007), «Достық» (2014), ҚР Мәдениет және ақпарат министрлігінің «Мәдениет үздігі» төсбелгісімен  (2012) және ЮНЕСКО-ның  «Алтын қыран» ордендерімен марапатталған.

 

 

Басты сөздер: Алматы, Мәдениет, Өнер,

Пікір қалдыру

Соңғы Пiкiрлер