Тайландта такси жүргізушісі жолаушыға көлікте ұмыт қалдырған 20 мың долларын қайтарды

АСТАНА. ҚазАқпарат - Тайлық Накхонратчасима провинциясынан 62 жастағы такси жүргізушісі Вимол Трипат көлік салонында ұмыт қалдырған 20 мың долларын клиентке қайтарып берді, деп хабарлады жергілікті БАҚ.

Дэвид Коллинсон  ақшаны жұбайына беру үшін  Австралиядан Бангкокқа ұшып келген. Ол әуежайдан Мор Чит автовокзалына дейін жеткізу үшін мистер  Трипатты жарты күнге жалдаған. Австралиялық үйіне жеткен кезде ол конвертпен ақшаны көлікте ұмытып кеткенін бір-ақ білген.   

Адал жүргізушінің айтуынша, Коллинсоннан кейін ол тағы бір клиент тасыған. Көлігін тексергенде, сол жақ орындықтан ақшаны көрген ол бірден иесіне қайтаруға асыққан.

Такси жүргізушінің адалдығына таңданған Дэвид оған шағын сыйлық жасады, деп жазады life.ru.

Фото: © РИА Новости/Владимир Сергеев