19:03, 05 Қазан 2017 | GMT +6
Таразда толассыз жауған жаңбыр салдарынан 5 үй су астында қалды
ТАРАЗ. ҚазАқпарат - Екі тәуліктен бері толассыз жауған жаңбыр салдарынан Тараз бен қала маңындағы жеке үйлерді су басқан, деп хабарлайды «ҚазАқпарат» ХАА тілшісі.
«Өткен тәулікте Жамбыл облыстық ТЖД жедел-құтқару жасағы тұрғындарға көмек көрсетуге барды, - делінген өңірдің ТЖ департаментінің хабарламасында. - Таразда толассыз нөсер салдарынан төрт үйдің аумағын су алды. «Өрт сөндіру қызметі және апаттық-құтқару жұмыстары» ММ күштерімен (бес адам, екі мотосорғы) су айдалып жатыр».
Жамбыл облыстық ТЖД алдағы үш тәулікте түнде ауа температурасы 1-6 градусқа дейін төмендейтінін ескертуде. Метеорологияның деректері бойынша, қазан айының басында Жамбыл өңірінде күннің күрт суытуы кездеспейді.