00:01, 14 Қаңтар 2018 | GMT +6
Талдықорғанда заңсыз адам тасыған жүргізуші жауапқа тартылды
ТАЛДЫҚОРҒАН. ҚазАқпарат - Талдықорғанда жеке кәсіпкер ретінде тіркелмей, адам тасып табыс тапқан көлік жүргізушісі әкімшілік жазаға тартылды, деп хабарлайды ҚазАқпарат тілшісі.
Талдықорған қаласындағы мамандандырылған ауданаралық әкімшілік сотында Т. есімді азаматтың ҚР ӘК 463-ші бабы, 1-ші бөлігі бойынша әкімшілік ісі қаралды.
Заңбұзушы азамат Талдықорған қалалық мемлекеттік кіріс басқармасына жеке кәсіпкер ретінде тіркелмей, кәсіпкерлікпен айналысқан. Яғни, өз көлігімен ақылы қызмет көрсеткен. 2017 жылдың 14-ші желтоқсанында оған басқарма қызметкерлері тарапынан әкімшілік заң бұзғаны туралы хаттама толтырылды. Заң бұзушы ҚР ӘК 463-ші бабы, 1-бөлігіне сәйкес кінәлі деп танылды. Оған 15 айлық есептік көрсеткіш, яғни 34 035 теңге көлемінде айыппұл салынды.
Қаулы заңды күшіне енген жоқ.