Талдықорғанда ретро әндер кеші өтті
Қазақстан Республикасының еңбек сіңірген әртісі Майра Ілиясова, Құдайберген Бекіш, Шахизада, Мирас пен Құралай және «Талдықорған әуендері» халықтық, фольклорлық-этнографиялық ансамблінің әншілері талдықорғандықтардың құлақ құрышын қандырып, тамылжыта ән шырқады.
Күннің салқындығына қарамастан Қаратал жағалауына жиналған халық көп болды. Жұлдыздар Талдықорған жұртшылығын мерекемен құттықтап, ілгері даму жолына сәттілік тіледі. Концертке жиналған өнерсүйер қауым, әсіресе аға буын әншілердің әнін тыңдап қана қоймай, естен кетпес ескі де есті әндерді қосыла айтып, би биледі. Ретро әндерден рухани сусындаған жұртшылық шараны ұйымдастырушылар мен өнер азаматтарына алғыстарын айтып тарқасты.
Айта кету керек, Талдықорғанда қала күніне арналған мерекелік шаралар 8-ші қыркүйектен басталды. Түрлі шығармашылық байқаулар, шеберлік сабақтары, ретро концерттер мен спорттық сайыстар, танымал тұлғалармен кездесулер, әлеуметтік нысандардың ашылуы, кәсіпорындардың тұсаукесерлері секілді көптеген шаралар биылғы мерекенің сәнін кіргізетін болады. Ал, негізгі мереке 30-қыркүйекте сағат 10-00-де қаланың орталығынан басталып, Жастар спорт сарайының маңы мен «Жастар» саябағында жалғасады.
