Шымкентте алғаш рет шетелдік азаматтың бүйрегі ауыстырылды
Шымкент қалалық жедел медициналық көмек көрсету ауруханасында алғаш рет тірі донордан трансплантация жасалды.
Израиль тұрғынына Украина азаматы донор болды. Күрделі отаны өңірдің трансплантолог-дәрігерлері өз күштерімен жасап шықты. Қазіргі уақытта науқастардың жағдайы қанағаттанарлық деп бағаланып отыр. Донор ауруханадан шығарылып, амбулаторлық емдеуге жолданды. Ал бүйрек алмастырған шетелдік стационарлық ем қабылдауда.
Бүгін бұл науқаспен облыстық денсаулық сақтау басқармасының басшысы Мұқан Егізбаев пен бірқатар дәрігерлер кездесіп, жағдайымен танысты. Алдағы уақытта өңірде медициналық туризмді одан әрі дамыту жоспарланып отырғанын атап өтті.
«Шымкент қалалық жедел медициналық көмек көрсету ауруханасында жоғары мамандандырылған медициналық қызмет көрсету үшін барлық жағдайлар жасалған. Шетелдік пациенттер үшін де ота жасаудың барлық қолайлы жағдайлары қаралған. Оның ішінде бірегей препараттардың қоры жасақталып, сервистік палаталар бар. Бағалары да қолжетімді болып отыр. Ота құны 4,5 млн теңге тұрады. Ал, Еуропа мен АҚШ-та бүйрек трансплантациясының орташа құны шамамен 60-70 мың долларды құрайды. Қазірдің өзінде бірнеше науқас кезекте тұр. Олардың арасында Болгария, Румыния сияқты бірқатар шетелдік азаматтар бар»,- деді Мұқан Кеңесбекұлы.
Еске салайық, 2013 жылдан бері Шымкент қалалық жедел медициналық көмек көрсету ауруханасының базасында 100-ге жуық бүйрек алмастыру оталары жасалды.