Шымкент мұнай өңдеу зауытында күрделі жөндеу жұмыстары мерзімінен бұрын аяқталды

None
None
АСТАНА. ҚазАқпарат - Шымкент мұнай өңдеу зауытында күрделі жөндеу жұмыстары Қазақстан Республикасының Энергетика министрлігі бекіткен кестеден үш күн бұрын аяқталды. Бұл туралы «ПКОП» ЖШС баспасөз қызметі хабарлайды.          

Өндірістің үздіксіз және апатсыз жұмыс істеуін қамтамасыз ету мақсатында жүргізілген күрделі жөндеу жұмысы аясында зауытта технологиялық жабдықтар, құбыр желілері, өндірістік пештер, сорапты-компрессорлық тораптар, кабель желілері, электр жабдықтары, негізгі және қосалқы қондырғылардың бақылау-өлшеу аспаптары мен автоматикасы техникалық куәландырудан және күрделі жөндеуден өткізілді.

Зауытты жаңғырту жобасы аясында салынған жаңа, үлкен технологиялық нысан - изомерлеу қондырғысын жұмыс істеп тұрған технологиялық желілерге біріктіріп, қосу жұмыстары жүргізілді.

Қазіргі уақытта өндіріс технологиясына және қауіпсіздік ережелеріне сәйкес тауарлы өнім алынатын болып, зауыттың технологиялық қондырғыларын кезеңмен іске қосу жұмыстары жүргізілуде.  

2017 жылғы 31 наурызда «ПетроҚазақстан Ойл Продактс» ЖШС-де шикізатты алдын ала гидротазалау блогы бар жеңіл бензин фракцияларын изомерлеу қондырғысында құрылыс-монтаждау жұмыстарының аяқталғаны жөнінде актілерге қол қойылған болатын. Қазіргі уақытта осы нысанда іске қосу-реттеу жұмыстары жүргізілуде. Бұл жұмыстарды ағымдағы жылдың шілдесіне дейін аяқтау көзделуде. Жұмыстар аяқталғаннан кейін К4, К5 экологиялық кластағы жоғары октанды бензиндерді алуға және олардың өндірісін жылына 460 мың тоннаға арттыруға мүмкіндік беретін изомерлеу қондырғысы іске қосылатын болады.

Сондай-ақ, Шымкент мұнай өңдеу зауытында зауыттың шикізат өңдеу қуатын жылына 5,25 млн. тоннадан 6 млн. тоннаға дейін арттыруға және шикізат өңдеу тереңдігін жоғарылатуға бағытталған жаңғырту жобасының екінші кезеңі аясындағы жұмыстар да қарқынды жүргізіліп жатыр.

 

Соңғы жаңалықтар